Jowai: Ka seiñ Jaiñtia National Council (JNC) da kynmoo warom ko ya ka lyngkhooh sngi yap wa 155 snem u Woh Kiang Nangbah ha ka 30 tarik ha Khliehriat ryngkat i emlang u President ka seiñ u Wanshwa Suting wa u Chief Adviser ka seiñ u Sambormi Lyngdoh.
Ha kani ka sngi da wan sakhi leh u Justine Dkhar uwa man u MLA ka thaiñ hei emlang u DC ka District u M.S. Lhuid, u Phasmon Dkhar uwa man kam u Executive Member ka JHADC hei emlang ki ar tylli ki seiñ wa kynthup ya ka JNC wa ka AJYWO.
Chwa wow sdang i booh syntu da em i klam wa tbian na u Phasmon Dkhar, u DC ka EJH u M.S. Lhuid wa u MLA ka thaiñ u Justine Dkhar.
U Justine Dkhar hei klam da ong u wa u Kiang Nangbah da chah pasi ym na iwon iwon i daw lait noh na i daw ka ri wa ka jaitbru ya kiwa oo maya bha u heiwa da khana chwa u wa i laitlooid ka ri u man i hapoh 100 snem nadooh wa chah pasi u iwa man leh ki kyntien khaddooh uni u khlawait.
Ini i leh warom toh kam chibynta wow pynkynmoo wei wow kyrsu thiah ya ki khynroo khyllood ka ri wow yieñ yaleh ki neibynta i hok wei wow bood ki ya ka thong ka yong ki.
Discussion about this post