Ka 30 tarik u Kmaichonglad toh ka sngi yap u Kiang Nangbah Khlawait ka Ri 12 Dolloi heiwa da pasi ya oo da ki chipai ka sorkar pharæng ha u snem 1862.
Kamtae hapoh ka Bri u Ynñiawtrep Ynñiawskum kam ka dak i sñiawngooh makhane ya ki kaam wa khroo u Kiang Nangbah yaka ri waka jaitbru, ki pateiñ kani ka juk ha kylleiñ ki chnong ki thaw da pynman ki i kynmoo warom wa kyrpang da ki yalang waphær waphær.
Ha uni u snem ka Loomkyrwiang Dorbar Chnong leh ha ka thong wow khriñ wei pynpsiah hei thij i pyrkhat ki bru wa chong chnong chaphang u Kiang Nangbah, hei janmiet yong ka 30 tarik da pynman ko i yachemlang wa kyrpang ha yungwalieh wei da saam leh ya ki khusnaam cha kiwa jop yong ka yakob thoh Poetry wei dro dur chaphang u Kiang Nangbah.
Ha ka yalang yong kani ka sngi hei pynlai u Daioolang Pakma, symbood waheh chnong da em i suki wa chipor kam ka dak i kynmoo warom kynmoo maya yow Kiang Nangbah wa ya kiwi kiwa yaleh laitlooid neitæ pynbood i ngoohblai na u S.D. Laloo, General Secretary LDCJ, i klam i khanna wa kyrpang chaphang u Kiang Nangbah da u Lammat-O Laloo, Waheh Chnong LDCJ, i klam e mynsien ya ki khon ka dorbar chnong da u kongsan kani ka sngi, u Roskil Challam, SDO-PHE Electrical Division, Jowai katwa hei pynkut da wan ka Samhakani Laloo, Secretary WWO LDCJ wow pachat ya ki kyntien khublei.
Discussion about this post