Shillong: Ka Maurice Patrick King Secondary School, Laitryngew, kawa da seiñ ha u snem 1944, ha ka pynhaap pyrda noh ya ka lehkmen dap 75 snem yong ka, ha ka 11 tarik, da kynmoo warom ya u (L) Lieutenant Colonel Maurice Patrick King, u heh chipai phareng, uwa da e yarap sñiawbha cha kani ka skur ha u snem 1946. Ya ka lehkmen da wai ha u snem wa da dep kawa man chisnem thij wei ha waroh chi snem ka skur da pynman ko yaki prokram waphær waphær yow leh warom yei kynjoh ka skur cha u moomær wa 75 snem.
Ya kani ka skur da seiñ daka Dorbar Shnong Laitryngew ha u snem 1944 wei da e kti won cha ki bor pynlai Balang Catholic Sohra Parish ha u snem 1946. Wei ha uni u snem wa u heh chipai phareng da lai u cha kani ka chnong wa uwi u Lyngdoh Niam ka Balang Catholic wei hawa yoo yei dooh ka skur, da e yarap sñiawbha u da ki tiar ki tar yow pynbha ya kani ka yung skur ha itu i por kawa tymmoh da malu mala.
Neiliang ka skur da pyntip leh wa da yoh yuitp ki chooh chooh chaphang uni u heh chipai phareng wa kiwa ha yung yong oo kiwa sah katni ha Los Angeles, USA wei neiliang yong ki leh da kwah ki wow yoh yutip chooh chooh chaphang kani ka skur wa u (L) Lieutenant Colonel Maurice Patrick King da e yarap u kawa da pynsahnaam leh ya oo deiwa e pyrtuid ya kani ka skur hei pyrtuid yong oo.
Ya kani ka skur da chimkti pynlai da ka Visitation Sisters of Don Bosco (VSDB) ha u snem 2016, iwa 18 snem hadien wa ki khynnah skur da yakhun ya ka exam matric (1998) ha ka sien wa nyngkong. Da pynchongkun ya ka yalang pynhaap pyrda ya ka lehkmen da ka lai March Pass ki khynnah kani ka skur, ki rwai, ki phawar, ki chaad tynre, ka Drill Display wa kiwi kiwi.
U Gavin M Mylliem, MLA ka Sohra Constituency, kam u kongsan ha kani ka sngi, da pyllait paidbah u yaka thup sahkynmoo (Souvenir) i lai luti kani ka skur ha ki 75 snem. Kiwi de kiwa ya emlang toh u L. Kynjing, SDO Sohra Civil Sub-Division, ka Sr. Otilia Nongrum, Headmistress kane ka skul, ka Sr. Mary Linda Synrem (VSDB), u Dr. AK Nongkynrih, NEHU, ki bor pynlai ka Sohra Parish, ki bru rangbah na ka chnong, kiwa sikai skur warim wa kiwa katni kamjooh ki khynnah kiwa da pyndep ya i puræ wa kiwa dang puræ ha kani ka skur, ki bei ki pa wa kiwi kiwi.
Ha kani ka sngi da pynkup burom ya kiwa sikai ha kani ka skur wei kamjooh ki khynnah skur kiwa da wan skur nyngkong ha kani ka skur nalor ki khynnah puræ kiwa da pass bha rap cha khmat ha ki Exam yong ki wa kiwa yoh heh Mark ha ka Subject Khasi wa kiwi kiwi. Kamjooh neiliang ka skur da pynkup burom ko leh ya u MLA uwa da yarap wow pynyoh ya ka Podium wei kamjooh wow pynbha ya ka madan yong kani ka skur.
Dur u Lieutenant Colonel Maurice Patrick King
Discussion about this post