Ka Meghalaya Bharat Scouts & Guides, West Jaiñtia Hills District kam chibynta i kynmoo warom ya ka World Environment Day da pynman ko i thung dieñ wei ya kani ka yalang da pynman ha ka sngi Thymblein 6 tarik Naiynru.
Chwa u chimbynta ki dkhot ka seiñ hei thung ya ki dieñ da em ka yalang yahkhmat wa tbian hei pynlai u Adiam U Bthuh, Jt. District Secretary MBS&G heiwa ka Siami Shylla, District Organiser (G), WJHD da e ko ki kyntien pdiang burom wei dayoh leh i klam i batai chaphang ki bynta wa yatoh wa ka World Environment Day na u Julius Lyngdoh, District Training Commissioner Scouts, WJHD kamjooh na ka S. Tariang, District Commissioner (G), WJHD.
Ka S. Tariang won hawa klam da kyrsu kyntu ko ya ki para dkhot wow man sakhiat kitæ ki bru wa em i sñiawkhia yei man ka rymaw neibhah da yoo wa ha kini ki sngi ki rukom tynjooh yow bru pyrthai wan ki ha ki dur ki rukom waphær neidaw iwa u bru pyrthai hi ym tip u ñiawkor u kheiñkor yei kyrkhu wa da yoh nei doh i pran yong ka.
U Julius Lyngdoh, DTC (S), West Jaiñtia Hills hawa e kyntien da pynkynmoo u wa ka mat kyrpang yong kani ka sngi ha uni u snem toh ka jooh ha u snem 1972 wa man-u-snem wa ka United Nation sdang ko u leh burom ya ka World Environment Day kawa ong “Only One Earth” wei ha uni u snem daman ko ka seiñ wa 50 snem.
Chooh chooh da khana u leh wa ka Scouts & Guides Movement kam kawi na ki seiñ wa em ka thong wow kreh yei miat i bha ka rymaw da pynmih ko ki Project waphær wa yatoh wei yada pynneh pynsah ya ki dieñ ki siej ki khloo ki kjam, i khanglaad yei pynemkaam ya ki Plastic wa kiwi kiwi.
