Kam chibynta wow kynmoo warom ya ka sngi wa da pynkrehkaam ya ka riti synchaar ka ri namo ka Constitution of India wa da chna da ka Constituent Assembly haka 26-11-1949 heiwa da tip leh ya ka kam ka Constitution Day kamjooh ka ‘Samvidhan Divas’, da pynman yaka yalang leh warom ynne hi ha Raj Bhavan, Shillong.
Ki sahep ka sorkar Meghalaya wa kynthup ya ki sahep wa ki wakreh ka Raj Bhavan, da yalang ki ha ka Durbar Hall wei da chim ki leh ya ka smai Constitution Day Oath deiwa puræ ya ka yurim ka riti synchaar namo ka Preamble wa yahkhmat da u Chief Secretary ka jylla Meghalaya, u D.P. Wahlang.
Ha u snem 2015, ya ka 26 tarik u Khonchonglad (Nov) da pynbna kam ka Constitution Day da u Prime Minister Narendra Modi heipor wa booh ya u mooyurim u motdur u B.R. Ambedkar uwa tip kam u Statue of Equality kawa man leh kam ka lyngkhooh sngikha wa 125 u Dr. Bhim Rao Ambedkar, uwa tip leh kam u Father of the Indian Constitution.
Kam chibynta wow leh warom leh ya u Dr. Ambedkar wa waroh kiwa da embynta wow thoh yaka Constitution, da sdang ya kani ka Constitution Day yow pynsñiawthooh leh ya kiwa chong chnong ya ki yurim wa da seiñ ya ka Constitution kamjooh yow pynskem ya ki.
