Jowai: Ki ar kur ka kur Lamare wa ka kur Laskor, da wai paidbah ki ya u mot sah naam yong u (L) Albin Lamare u MLA warim ka Nongbah uwa man leh uwa seiñ ya ka Albin Lamare Memorial Secondary School, Nongbah, WJH uwa da chna ha pchem kani ka skur.
Ya uni u mot sah naam da wan wai pyrda ya oo da u kongsan u L.S. Lyngdoh, Deputy Director DSEL hei emlang ka symbood kongsan ka M. Pde, DSEO, WJH, kamjooh ki ar liang kur wa ki dkhot ki Balang waphær kiwa kynthup ya ki Pastor, ki Tymmem Wasan, ki Phadar, u Dolloi, u Pator, kiwa sikai ki khynnah skur wa rim wa kiwa katni wa ki manbei manpa.
U Rev. A.L. Laskor uwa man leh u khon yong u (L) Albin Lamare uwa da khana ya ka parom chaphang u Albin Lamare, da ong u wa da kha ya oo ha ka 13 tarik u Niasan ha u snem 1936 ha ka shnong Nongbah, West Jaiñtia Hills wei da khlaad u ha ka 27 tarik u Naisan ha u 1982.
Da sdang u ya ka skur deiwa pyrkhat yei puræ puthi ka wow pynku ya ka jaitbru neibhah ki khynnah toh wa man ki ka ma mynried mankawi ka jaitbru.
Da psiah u cha ka kaam siañhima sima deiwa yieñ kam u MLA naka Nangbah Nartiang Constituency ha u snem 1972 tangwa da rem u katwa ha u snem wa bood won da yieñ u kam u MDC na ka Nangbah Mynsoo Constituency.
Ha u snem 1978 da yakhun biang u kam u MLA wei ha kani ka kynti da jop u. Ha u jooh u snem ya ka Nangbah Proceeding High School da kylla pyrtuid cha ka “Albin Lamare Memorial Secondary School”.
Ha kani ka sngi da yoh leh yei klam na u Lakhon Lamare, u K. Pasi Waheh Chnong, u Dolloi u M.K. Garod, ka Monica Laskor, Headmistress kawa man leh ka khon u (L) Albin Lamare, u Prof. H. Lamin PVC NEHU wa kiwi kiwi wei ya ka yalang da pyllai da u L.S. Lyngdoh, Secretary Chnong.
Discussion about this post