Kamwa da leh ha waroh ka ri wow kynmoo warom ya kitu ki pulit wada khlaad noh na sla pyrthai heipor wa pyndep ki yei kaamram ya kawa datip kam ka “Police Commemoration Day”, neiliang ki pulit ka West Jaiñtia Hills District ynne i step da chim ki ka bynta wow kynmoo warom ya kani ka sngi ha pchem ka Police Reserve Administration Building, West Jaiñtia Hills, DEF Jowai.
Ha i step u Superintendent of Police u Bikram D Marak da khana u wa kani ka sngi toh i kynmoo warom ya ki para pulit kiwa da e dei mynsien neibynta ka ri, heiwa da dooh noh ki yei mynsien katwa dang pyndep ki yei kaamram yong ki. Kamtæ ha uni u snem da em hadooh 264 ngut ki pulit hapoh ka ri kiwa da dooh noh ya i mynsien yong ki hawa chakri ya ka ri.
Ya kani ka Police Commemoration Day ha Jowai da chimbynta leh da u Additional SP u B. Chetri, ka DSP (Hq) ka C.W. Lyngdoh, u CO ka 3MLP Bn u Chemphang Syrti, u Superintendent ka District Prisons & Correctional Services, West Jaiñtia Hills u U. Kyndiah, u DSP ka (DPCS) u Batskhem Nongbri wa kiwi kiwi ki sahep pulit na ki chnat waphær waphær.
Ha ini i step da puræ leh ya ki pyrtuid ki 264 ngut ki pulit na ki jylla waphær ka ri kiwa kynthup ya ki pulit ka sorkar pyrdi (Central Armed Police Force) kiwa da khlaad nadooh u 31 Naikhynde 2021 hadooh 1 Naichiphaw 2022.
Da pynman ya i booh syntu da ki heh pulit wa kiwa hayung ki pulit wa da khlaad wei da siat suloi kam ka dak wow warom ya kini ki pulit.
Ynne i step u SP ka District da kaweh lama u ya ka ‘Bike Rally West Meets North in East’ heiwa da yahkhmat da u Commandant ka 3rd BN MLP Sahpsein u Chemphang Syrti, katwa ya ka 6th BN MLP Umran da yahkhmat da u Lakador Syiem wei da yachem ki ha East Khasi Hills.
