Jowai: Yow ya ksohktilang waka ri waroh kawi neibynta i kynmoo warom ya kitu ki pulit wada khlaad noh na sla pyrthai heipor wa dang pyndep ki yei kamram ya kawa datip kam ka “Police Commemoration Day”, neiliang ki pulit ka West Jaiñtia Hills District deilang waka chnat Home Guard, ynne i step da chim ki ka bynta wow kynmoo warom ya kane ka sngi ha Police Reserve Administration Building, West Jaiñtia Hills, DEF Jowai.
Ha kani ka step u Superintendent of Police u Bikram Marak da khana u wa kani ka sngi toh i kynmoo warom yaki para pulit kiwa da e dei mynsien neibynta ka ri ka jaitbru, heiwa da dooh noh ki yei mynsien katwa dang pyndep ki yei kaam. Kamtæ ha uni u snem da em hadooh kamwa 264 ngut ki pulit hapoh ka ri kiwa da dooh noh ya i mynsien yong ki.
Ya kani ka Police Commemoration Day ha Jowai da yahkhmat da u SP ka District u B. Marak, u Additional SP B.Chetri, ka Dy. SP Crime ka C.W. Lyngdoh deilang wa ki kattu katni kiwa chah khut sñiawbha deiwa da pynman ya ka suki wa chipor, i booh syntu, nalor wa da puræ leh yei pyrtuid kiwa da khlaad noh naki jylla waphær waphær ka ri.
