Ka chnat yong ka Union of Cooks cum Helpers PM POSHAN ka Ri-Bhoi District deilang waka seiñbei Shillong, haka 30 tarik hei sien wa nyngkong da chim ki ka laad wow kynmoo warom yaka lyngkhooh snem yap wa 161 u Woh Kiang Nangbah khlawait ka ri wei yeini i kynmoo warom da pynman ha chnong Umtngam, Ri-Bhoi District.
Ka Banalis Syiem kam ka President naka seiñbei hawa klam da pynkynmoo ko cha ki spah ngut kiwa chet ja skur wa wan cha kani ka yalang wa toh lyngba i e bor e mynsien ka bei u Kiang Nangbah ka Rimai Nangbah tæ chimbynta u Kiang Nangbah ha ka dorbar ri wow yakhun pynlaitlooid yaki manbei, ki kynthai ka Ri Ynñiawtrep nei chah thombor ha ki bor wa wan na ri sep sngi.
Ha kani ka yalang kynmoo warom ya u Woh Kiang Nangbah, u Khroo L Pariat kam uwa e buit ka seiñ ong u ha u Kiang Nangbah em ka bor mayan Blai, man u leh u bru wa maya ri, uwa em i chaniah wei kyrmen, uwa ye leh wow wanrah i sñiawthooh yumut, i yatylli neibynta u yakhun pyrchah waki pharæng.
Sñiawngooh haroh u ya kiwa yahkhmat ka seiñ, kiwa chet ja skur ka thaiñ Ri-Bhoi wa da chim ki u kynmoo ya kani ka sngi kyrpang u khlawait ka ri, wei da kyrpaad u leh ya kiwi kiwa yahkhmat kynthai wa chynrang haki thaw waphær waphær ka jylla u pynman ki kam kani ka yalang kynmoo warom yaki khlawait ka ri wot neibynta u Tirot Sing Syiem wa u PA Togan Sangma.
Wei lada toh wa ye u leh yeini, ki pateiñ hadien leh u sñiawthooh ki wei u em ki leh i mynsien maya ri wow yada yaka ri ha ki liang waphær waphær khamtam ha kini ki sngi wa ki bru na baar da sdang hiar thma ki suki suki yow pyntlot yaki khynroo khyllood hadooh wow yoh laad ki u pynlai yei khih i khan ka khyndaw ka chyiap nei wym yoh u yoo u chynna, wei wot u knieh leh yaka kur ka jait ki tre ri tre muluk.
U Khroo L Pariat da puræ haroh u yaka chithi wa da thoh da u Director School Elementary & Literacy ka sorkar jylla cha ka seiñ, hajrong ka phang wow pynkrehkaam yaka aiñ Right to Education Act 2009 neibynta ki khon kiwa chet ja skur wa kiwa kreh mylla sngi ha waroh ki skur sorkar, skur SSA, ki skur wa yoh yarap naka sorkar nadooh ki skur khian hadooh Secondary, ka wow krehkaam nadooh u snem 2024.
Ha kani ka sngi da yoh leh i klam na u Jerry A Suting, President All Jaiñtia Mid-Day Meal Workers Union, Jowai, na ka G. Nengnong, President ka seiñ na East Khasi Hills District hei emlang ka A. Nongsiej, President ka seiñ na South West Khasi District, u C. Shongwan, General Secretary ka seiñ na Ri-Bhoi wa kiwi kiwi.
Discussion about this post