Kynmoo warom yaka International Labour Day ha Jowai

Jowai : Ka District Legal Service Authority West Jaiñtia Hills District ha ka 29 tarik u Naitung (April) da pynemwarom ko ya ka International Labour day ha District Library Auditorium Mynthong, Jowai.

Ha kani ka sngi dawan u chim bynta boon ki manbei manpa kiwa man leh kiwa kreh mylla wa kynthup nadooh ki wa kreh Muster Roll, kiwa kreh misteri wa kiwi kiwi.

U ma Markus Surong Advocate hawa e i klam yong oo ong u wa kiwa kreh mylla haki por nachwa jooh chah yoobeiñ ki ha ki bru wa embor khamtam i chah pynkreh yabor ki khynnah, kamtæ neiliang ki wa synchaar ha ka pyrthai da thooh laad ki yow pyndooh pyndam yeini heiwa da ye u chna yaka aiñ. Kamtæ da pynemwarom ya kani ka sngi International Labour Day toh hadien wa kiwa mylla da yoh ki yei hok yong ki.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Ha kani ka sngi da em leh i pynche paidbah hajrong ka “Meghalaya Building and other Construction Work” heiwa da pynche da ka kong B. Nongrum, Labour Inspector Jowai. Hei klam yong ka da pynsniaw ko chiboon ki skhim wa kiwa kreh mylla sngi næ kiwa kreh Muster Roll ye ki u yoh manda pynpsiah pyrtuid ki hapoh ka ophis Labour wei ym hoi u duna ya 18 snem ne palat 60 snem i rta wei hap u su du 30 tyngka chibnai.

Ki yarap wa ye ki paidbah u yoh lyngba ka ophis yong ka Labour man ki kamni næ :

1. Hei por wa kha khonboo kamwa T. 1000 cha kitu ki wom duna chisnem i man dkhot.
2. Ye leh u yoh ya ka pension hadien wym ye de u khih u kreh dei wow haap u su T. 150 chibnai haap man dkhot ym duna ya ka chisnem.
3. Em leh ki ar jait ki jait ram (loan) i wym boi kheiñ sut kawi nei bynta u chna yung kawa T. 50,000 kiwa ye u yoh toh ki wym duna 5 snem i man dkhot.
4. Sa kawi ka ram toh neibynta u thied tiar thied tar kamwa T. 5000 wei em hoi u duna 3 snem i man dkhot.
5. Em leh i yarap poisa ha wa thiah hospital kamwa T. 200 nei bynta 5 sngi i thiah hospital neitæ won daw pynku hadooh u poi T. 1000.
6. I yarap neibynta i bia toh du ya ki kynthai kiwa man dkhot ym duna ya 3 snem kamjuh ya arngut ki khon kynthai yong ki hei dor T. 2000 .
7. Neitæ won i yarap manda takha næ mynsoo ya ki dkhot i doh i pran T. 15,000, katwa ya kitu kiwa yap mynsoo heipor wa dang khih dang kreh ki u ioh ki T. 50,000
8. I yarap neibynta i bai tlep lane bai thang ya kiwa yap kamwa T. 1000.
9. Ka Cash Award ya ki khon lada pass bha ki haki exam neibynta 3 ngut ki chynrang  wa 3 ngut ki kynthai.
10. Ka scholarship ya ki khon nadooh Class V ya kiwa yoh marks ym duna 50%.
11. Ka Disability Pension neibynta kiwa yoh kjut heipor wa dang man dkhot T. 150 chibnai natlor kani ye u yoh yarap T. 5000 ya kiwa ym duna 3 snem i man dkhot.

Kamtæ da kyntu ko ya ki paidbah u wan ki chakhmat yow pyn psiah pyrtuid yow yoh yarap neibhah ka poisa boon bha ko da ki klur katwa kiwa wan register dang duna bha ki.

Ya ka yalang da pyllai da u J.D. Paswet President Muster Roll Worker Union Jaiñtia Hills District, i  ktien e khublei ha kani ka sngi da yoh no u ma I. Rymbui Chief Judicial Magistrate and Member Secretary District Legal Service Authority West Jaintia .