Hadien wa pteiñ ki Karbi wow thombor ya ki paidbah yong ka chnong Khanduli hawa lai rep kba rep soh ha ki thaaiñ khapood wei ym chah ki leh ya ki Khanduli wow psiah u mih ki cha ki thaaiñ Karbi, kamtæ ka seiñ KSU Namdong Area Unit da dap ko dei chrai ya ini i leh embor ki Karbi ya ki para doh para snaam iwa da pynman ya ka seiñ wow mih chakhmat yow kynreh ya ki karai kamai wa ki kari ki bru samen boi ki Karbi thooh laad thooh luti ki wow wan yaaw ha kani ka thaaiñ wa kiwi de ki kaam.
Ka seiñ da kyntu ko leh ya waroh kiwa chong chnong yong kani ka thaaiñ wa ya waroh ki waheh chnong wow ya ksohktilang ki waka seiñ wym e laad yei mih i psiah wei wow ya khayi pateiñ wa ki nong Karbi kat hadooh u wan biang i chongsuk hapyrdi ki Karbi wa ka chnong Khanduli hi waroh kawi.
Ka seiñ da maham ko leh wa lada em kiwa leh pyrchah daw hap chim ki yei kitkhlieh.
Neiliang yong ka seiñ da ong ko wa daw em bait ko ha chrooh ka chnong Khanduli khamtam hawa maad ki ya kam ini i eh.
