Shillong: Ka Bharatya Janata Party (BJP) North Shillong Mondal, ynne ka sngi da ong ko wa ka ym tipmit ko ya u Tony Marbaniang, uwa man leh kam uwi na ki kyrtong wa thmu wow paan ticket na ka party BJP, wei da ujor u pyrchah ya u J.A. Lyngdoh, uwa man kam u Vice President ka BJP State Meghalaya Unit ha Sadar Police Station ynnin ka sngi.
U President ka BJP North Shillong, u Wallambok Thangkhiew da ong u wa, u Tony ye u wow man kam u dkhot ka BJP tangwa neiliang ka Mondal ympu jooh yachem sakhiat ki ya oo, da ong u leh wa ka BJP toh ka seiñ wa yaar i pyrkhat wei i rukom krehkaam wei ye u pynpsiah pyrtuid cha ka seiñ lyngba ka Online Registration.
Katkam wa ong u Thangkhiew, da ong u wa lada u kyrtong næ kiwi won ki dkhot ka party pynman ki ya ki yalang haap ki wow lai lyngba ki Mondal, tangwa u Tony da pynman yalang u ha ka 14 tarik heipor 11 waje i step ha Oakland khlem pyntip ya kiwa yahkhmat ka party.
Hajrong ka ujor cha ki Pulit pyrshah ya u Montri Sorkar warim ka Jylla uwa man leh uwi na kiwa yahkhmat ya ka seiñ Bharatiya Janata Party (BJP), u J.A. Lyngdoh da kyntait u yei kynnoh u Tony wei da ong u wa ha ka yalang kawa da man ha Oakland Community Hall, Bivar Road ha ka 14 tarik, oo ym em u klam u iwon iwon wow daisarom ya u Tony tangwa da em hi-eh kiwa e yumut ki kattu katni ngut kiwa ong wa emkaam u pynbait wa oo khnang wow kyrriah u na i yakhun Election tangwa da kyntait noh ya ini i tyrwa.
Da ong u wa myntu ka sngi ka party daw lai ko wow paan ya ka ujor pyrchah ya oo wa ki sakhi wa da e heipor wa ujor khnang wow chem ya iwa sakhiat, da pyntip u leh wa ya ini i kaam da ekti cha ka Legal Cell yong ka party ka wow sylli ya kani ka ujor, wei ya ini daw phah cha ka BJP Shillong City wa cha ka BJP Meghalaya.
Ye wow kdaw heini wa neiliang yong u Tony da pynbna u wow chong kyllaiñ myngngor hakhmat ka yung krehkaam ka BJP mynstep wow pyrchah yeiwa da pynbaad u heh ka seiñ.
Also Read: Ujor u dkhot ka BJP pyrchah ya u Vice President yong ka wa daisarom u oo
Discussion about this post