U MLA ka KHNAM na North Shillong, u Adelbert Nongrum ynne hapoh ka yung dorbar da pyrchah u yei thmu ka sorkar wow pynkylla ya ka aiñ Meghalaya Compulsory Registration Act 2012 lyngba ka Amendment Bill 2022 deiwa ong u wa ini i leh ka sorkar da pyntlot ko ya kani ka aiñ heiwa daw man kam kawa em kjat du chiliang donhi.
Da ong u wa i thmu yong kani ka aiñ toh wow yarap wei wow yada ya ki kynthai kiwa chah ieh ha u kurim yong ki wei deiwa pyndam ya i kyntien “Official Purpose” napoh kani ka aiñ hawa emkaam wow pynemkaam ya ka Marriage Certificate kam hawa wai Bank Account, yaleh Passport wa kiwi kiwi da pyntlot noh ko ya kani ka aiñ.
Neiliang yong u Montri wa pait ya ka chnat wa yatoh wa ki aiñ, u James PK Sangma da ong u wa i pynkylla ya ka aiñ ymem mut wa ym emkaam de wow pyntip tipmit yei man kam chi kurim lada dei bia lane deiwa ya sahlang kam chi kurim, i pynkylla toh du wow lait nei kulmar wa mih hawa pykrehkaam ya ka aiñ w da wanrah ha u 2012.
Chooh chooh da ong u wa ki kyndon wa hap u bahkhlieh ya ka kynthai, i yoh pateiñ, i yoh Pension wa kiwi dang neh ki kamjooh hi. I pynkylla toh du wow pyndam ya ki kyntien wa ong “Whereas its further mandatory for married men and married women to compulsory furnish a marriage certificate for all purposes” wei wow pyndooh leh yei batai iyi mut i kyntien “Official Purpose” hapoh kani ka aiñ.
U Montri da ong u wa ini i kyntien Official Purpose toh iwa da pynkulmar yei pynkrehkaam ya kani ka aiñ kamtæ da pyndam ki wei yei emkaam wow pynyoo ya ka Marriage Certificate chong hei kaam wa leh deiwa e nongmuna ya ka Driving License kawa ymtoh kawa emkaam wow pynyoo kat cha wa lai tangwa ha ki por wa toh u pynyoo ya ka ym hoi u dam iwa mut leh i jooh ya ka Marriage Certificate.
Neiliang u Adelbert ym bien u wow pyndam yei pyrchah yong oo, kamtæ da chim ya ka Vote heiwa da pynrem yei pyrchah u wei da mynjur leh yei pynkylla ya ka aiñ.
