U Kerlang Ksoo da yaleh u ya ka mukotduma PIL ha ka High Court ka Meghalaya pyrchah yei dai yei thaw khlem da bood ya ki kyndon aiñ wa em ha chnong Daistong, East Jaiñtia Hills yow booh ya ka karkhana Shree Cement.
Ha ka mukotduma da ong wa dadep leh wow thoh cha ka Meghalaya State Pollution Control Board kamjooh cha u Deputy Commissioner ka East Jaiñtia Hills District tangwa ym em leh iyi heiyatoh wa ka Public Hearing kawa daw pynman ha ka 19 tarik uni u bnai.
Da ong leh yei thaw wa heh kamwa 61.97 Acre wa tip kam i Khara Siang Lum Pyrshim wa em ha Daistong da dai ki ki hapyrdi u Tribal wa u Non-Tribal yow booh ya ka karkhana pynmih khyndaw-bilat.
Chooh chooh da ong wa ini waroh ym em leh katkam ki kyndon aiñ wei ka Pollution Board leh ym em e Environmental Clearance ko tangwa daw pynman bait ya ka Public Hearing ha ka 19 tarik.
Tangwa neiliang ka High Court da ong ko wa uni uwa yaleh mukotduma ymtoh uwa chah ktah wei kiwa chong chnong wa chah ktah ym em wan ki chakhmat yow pyrchah yeini i daw thaw.
Sa iwi leh da kdaw ka High Court wa da em chwa kawi ka mukotduma Writ Petition wa da yaleh da uwi u tre thaw yow khang yei e bor wow booh ya kani ka karkhana neidaw wa daw chah ktah ki Patta wa em u wei i bichaar yeini dang lai i chakhmat heiwa ym em pynmih hukum leh yow pynsangeh ya ka Public Hearing.
Hajrong ini waroh neiliang ka High Court da rai ko wym pdiang ya kani ka PIL tangwa kitu kiwa chah ktah na ini i dai thaw wa da leh da ka sorkar næ da kiwon kiwon ye ki wow wan hakhmat ka yung bichaar yow leh katkam ka aiñ.
Discussion about this post