Ka High Court ka Meghalaya ha ka 8 tarik uni u bnai hadien wa dep bichaar ya ka mukotduma wa da yaleh da u Treda Sungoh uwa da chah rai pynrem ha ka yung bichaar Special Judge (POCSO), West Jaiñtia Hills ha ka 13-02-23 heiwa da phah kset ya oo 20 snem deiwa pynchitom joor, da kyntait ko wow pynkylla ya kani ka hukum phah kset.
U Treda Sungoh da chah ujor FIR u ha ka 23-08-21 wa slaitbor u ya kawi ka khynnah kawa dang 15 snem ha ka 22-08-21, wei ya kani ka takit da pynman ka WPSI ka I. Kharpran yong ka Women Police Station, Jowai.
Hawa yasaaid u muktiar u Treda, da ong wa da chah pynngat u hapoh ka aiñ POCSO khlem da tikna yei rta kani ka khynnah wei ki Doctor leh ym ye ki wow pynsakhiat wa chah slaitbor kani ka khynnah wei ym em bood leh ya ki kyndon aiñ hawa chah bichaar.
Tangwa neiliang u muktiar ka sorkar da ong u wa da em ka Birth Certificate wa e da ka chnat i chait i khiah wei ka Medical Report da ong che ko wym ye u ong wa kani ka khynnah ym em chah slaitbor ko.
Ha ka sngi wa chah slaitbor kani ka khynnah, u Treda da chem u ka ha luti heipor wa lai thied tiar ko heiwa oo da wan u da ka kari wei da kylli u na ka heiwon em dukan wei da pynbor u ka wow psiah hapoh kari yow pynyoo thaw tangwa da kit u ka cha iwi i khloo wei sai yabor u ka napoh kari wei da slaitbor u ka wei da pynsah u ka ha ini i khloo waroh chi miet wei heini i por da slaitbor u ka ar sien.
Manda poi i step da lai pynhiar u ka hajan ka chnong kani ka khynnah.
Ka yung bichaar hawa pait ya ka Medical Report da chem wa ki dak ki chin pynyoo ko wa chah slaitbor hi kani ka khynnah wei ka Birth Certificate ko da pynyoo wa da kha ya ka ha ka 26-02-2006 wei da man ko 15 snem heipor wa jia ya ka.
Chooh chooh deiwa pait yeiwa da khana kani ka khynnah yeiwa jia ya ka, ka yung bichaar da hun ko wei da kyntait ko wow pynkylla ya ka hukum wa da pynmih chwa yow phah kset 20 snem.
Discussion about this post