Ka Khasi Hills Autonomous District Council (KHADC) da kyntait ko ya ka Buliding Bye-laws 2021, wa da pynbna da ka sorkar jylla neibhah wym yahaap yei thmu yong ka sorkar, wei da yaphær na iyi wa da yaklam wa ki Autonomous District Council.
U Executive Member wa pait yaka Building Bye-Laws ka KHADC, u Paul Lyngdoh da ong u wa hachwa wow chna ya ka Building Bye-Laws wa thymme, da em ka yalang wa ki le tylli ki ADC ya kawa da khut da ka chnat Urban Affairs hapoh i pynlai u Montri wa toh u pait ya ini. Da pyntip u wa ha waroh le tylli ki yalang da yaklam bait yei phiah ya u pood u ang hawa pynkrehkaam ya kani ka aiñ, heiwa ka sorkar daw kreh ko ha ki Municipal Area, Scheme Area, ka Shillong Urban Agglomerate wa ha ki thaw wa toh ki yong ka sorkar.
Da pyntip u wa lait na kitai ki thaw da yaklam hawa yatoh wa ki thaw wa em hapoh yong ki Autonomous District Council, tangwa da pynlynngoh won wa ya i rai na katai ka yalang ym em hiwot wow pynpoi, wei da pyntip cha ka Council wa da pynkrehkaam ya ka Building Bye-Laws 2021. U Paul da ong u wa kani ka Bye-Laws wa da pynmih da ka sorkar da yaphær ko chiboon na iyi wa yaklam ha ki yalang.
Da ong u leh wa ha u snem 2019, ka sorkar jylla da pynbna ko wa ki Autonomous District Council daw em ki ka yong ki hi i bor wa e bor katkam ka aiñ næ Bye-Laws ha ki thaw ka Council, tangwa manda poi won ha ka Building Bye-Laws 2021, i pyrtuid yong ka District Council da mih du neibynta wow khut yow booh donhi yei pyrtuid na khmat, wei lait neitæ ym em klam de iyi iyi leh wa ki ADC wa ki thaw wa ye u krehkaam. U EM da pyntip u wa ha ka yalang da yakut wa ye u pynemkaam da ki jooh ki Bye-Laws yong ka sorkar næ ye wow em leh jar jiar ki Bye-Laws kawa katkam wa yahaap wa ki chnong ki thaw.
U Paul da ong chooh chooh u wa najrong kini ki thaw da booh sa kawi ka kyndon kawa ong wa ki thaw wa em 50,000 Square Feet chaneiñ hap wow leh da ka Bye-Laws yong ka MUDA, wei ki bru yow e bor wow chna yung ki paidbah toh u man ki da ki Engineer wa ki Architect kiwa em ya ki PhD wei toh u man kiwa da em hei kaam la 10 snem, heiwa da pynrap wa kam kitæ ki bru ym em ki ha Meghalaya wei kini kiyi kiyi toh ki wym ye u man.
