Shillong: Ka Khasi Students Union (KSU) Laban Circle da kyntait ko yei pynbaad leh Politics yong u MLA ka South Shillong, u Sanbor Shullai hajrong i pyrchah wow e naam ya ka Zig Zag Road cha ka Ardhendu Choudhuri Road.
Hawa klam waki laad pathai khubor, u President ka KSU Laban Circle, u Manly Nongpluh da ong u wa ka seiñ da booh ko ya ini i dawa nadooh u snem wa da dep, deiwa pyntip waka seiñ da yachem ko leh ya u Sanbor Shullai ha ka 25 tarik u April 2019, wei hadien chi sngi ki dkhot ka seiñ da lai ki wow yachem wa u Montri wa pait yaka GAD, u Comingone Ymbon yow pynbait biang ya i rai wow e naam ya katai ka sarok.
U Nongpluh da ong u wa haka yalang wa u MLA ha u snem wa da dep, da em ka yalang wow kylla noh ya itai i thmu wow e naam ya utai u sarok, khlem da sñiaw emkaam de wow yoh da i thoh.
Da ong chooh chooh u wa ka seiñ da pynsñiaw ko ha u MLA wow pyrkhat chwa wow e naam yaki tre jylla bar yow e da i pyrtuid yong kiwi.
Da pynsñiaw u yei sñiawkmen neibhah ya kiwa boon ki sarok haka chnong Laban da e naam ha ki Khasi, tangwa ka seiñ da phylla ko wa ym em kynthup yaka Zig Zag.
Kam wow kdaw heini wa yaka Howell Road, ADB Road Batti Bazaar wa Sylhettipara Road da e naam ha i pyrtuid yong u Thranghok J Rangad Road, Roland Lyngdoh Road wa Khrep Sing Swer Road, yaka Jackson Trace Road ha Lower Lumparing da tip noh da ka Milanton Kharkongor Road.
Chooh chooh u Nongpluh da pyntip u waka Dorbar Chnong KOR (Kenches’s Trace-Oxford & Rilbong) hadooh kattæ ym pu e yaka NOC wow e naam yaka Zig Zag Road cha ka Ardhendu Choudhuri Road.
Ka KSU ha ka 11 tarik u Thohlakhmi (Feb) 2019 da paan pynche ko leh naka Dorbar Chnong KOR hajrong i thmu wow e pyrtuid ha u Choudhuri, heiwa ka Dorbar Chnong da pynche ko khlem pu e yaka NOC cha ka sorkar wow pynkylla pyrtuid yaka Zig Zag road cha ka Ardhendu Choudhuri Road. Tangwa hadien waka Dorbar Chnong da pyntip ko cha ka seiñ wa haka Executive Meeting wa man haka 14 tarik u Thohlakhmi ynnin u snem, da rai wow e naam noh ya katai ka surok ha u Dapstarlin Mawlong uwa man kam u waheh chnong wa da ksoh hadooh 25 snem, tangwa hadien wa sñiawthooh wa ka kaam da lai ko chakhmat, ka seiñ da e yumut ko wow e naam noh ha i pyrtuid u H.S. Lyngdoh, uwa sah leh ha Oxford, Laban.
Ha iwi i liang, u Nongpluh da ong u wa ka seiñ smat ko wow yachem wa u Montri Rangbah, u Conrad K Sangma lada emkaam hajrong itai i thmu pynkylla pyrtuid yaka sarok.
