Kyntait ka NEHSU yeiwa chah pynbaad wa pyn awri awra ki dkhot ha NEHU Tura Campus

Shillong: Ka North Eastern Hills University Students’ Union (NEHUSU) ong ko wa daw e FIR ko pyrchah ya u Proctor ka NEHU Tura neidaw wa pynkhor u ki ki dkhot ka Union kamjooh ya u Pro VC ka NEHU Tura wa klam ya ki ktien khlemakor ya kiwi ki jaitbru.

Kam wow pynkynmoo ki dkhot ka Students’ Union hawa lai ki cha ka Tura NEHU Campus da chah pynbaad ki wa kawang moo ki ya i yung sah u Pro Vice-Chancellor.

Haka kyrwoh wa phah da ka Union da pynche ki wa iwa jia ha NEHU Campus toh iwa ym ye u pdiang neidaw wa ka i chah pynbaad ka NEHUSU toh iwa khlem yurim wei da beiñ joor ya ini i leh ki heh ka NEHU Tura Campus.

Heiyatoh wa i kawang moo, ka NEHUSU da ong ko wa ki dkhot ka seiñ da chah pynbor ki wow phla haka jooh ka sngi ka 7 tarik heipor 6 waje i miet hadien wa mih boon ngut ki bor wa pynlai kiwa da pyntieñ ya kiwa ksoh kaam ka NEHUSU.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ka Union da kam ko leh wa u Proctor ka NEHU Tura Campus da maham u ki leh wa daw em ki bru wow dat ki lada mih ki napoh ka Guest House.

Hadien ini ki dkhot ka Union da paan bor ki na ki heh ka NEHU wow chah ya ki wow sah miet ki haka Guest House ha ka tai ka miet wei daw mih noh ki ha ka step kawa bood.

Ka NEHUSU da pynbaad ko leh wa ha chwa wow chah ya ki dkhot yong ka wow mih ki naka Guest House u Proctor da beh u ya ki dkhot ka NEHUSU wei da pha u ya ka President ka Union, ka Geniuca Majaw wow neh ko samen.

“Du hadien wa ka President da yaam ko wei da paan yarap ko da wan kiwa sikai wa kynthai kiwa da kyrpaad ya u Proctor wa u PRO VC Tura wow chah ya ki wow sah miet ki waroh,” da ong ka kyrwoh.

Ka NEHUSU da ong ko leh wa ka NEHUSU President, ka Majaw da chah pynjaw ko ha kiwa kreh mylla heipor wa dang uiñ ko ya ka Tura Campus haka 7 tarik uni u bnai.

Ka Union da ong ko leh wa ka Majaw da pyntip ko ya ini cha ki dkhot kiwa da lai wow yaklam wa kiwa kreh mylla yow man ki kiwa em akor.

Ka Union da ong ko wa ini i chah pynjaw ka President toh iwa chimkhia bha ka Union wei daw e FIR leh pyrchah ya kiwa kreh mylla.

“Lada kiwa kreh mylla chah tba kti, toh u wanrah ya ki Medical Examination Report yow pynsakhiat ya ini,” da ong ka Union.