Ka Environment Coordination Committee (ECC) Elaka Sutnga da pynsñiaw ko yei sñiawkmen yei jop wa khian hei lai luti ko wow yaleh pyrchah yei mih ki karkhana Coke Factory wa man pyrchah aiñ hapoh ka Elaka Sutnga heiwa ka sorkar da e jubab ko wa da phah wow khang ya 31 tylli kini ki karkhana wa krehkaam pyrchah aiñ wei ym em e bor leh wow sdang ya 29 tylli kiwa da paan bor.
Ka ECC da ong ko wa daw pteiñ ko yeini i yaleh pyrchah ya kini ki karkhana wa da chim kabu da kitu kiwa em hei bor nadooh ka sorkar waka District Council hakhmat ka aiñ wei ya ka mukotduma wa da yaleh ka Committee ha ka NGT daw chong bichaar biang ya ka ha ka 10 tarik uni u bnai.
Ka ECC da ong ko wa na ki por cha ki por da dawa ki wow pynchitom ya kini ki 29 tylli ki karkhana kiwa da chah kyntait tangwa kattæ leh da chna wei pynkrehkaam ya ki heiwa da toh u tympra ki heiwa ym em pynchitom ya ki lait noh ki 9 tylli ki karkhana kiwa da chimkhia u DC warim ka District, u E. Kharmalki wow booddien.
Ka ECC da pynsñiaw ko leh yei sñiawkhia heiwa ka JHADC da e NOC ko cha 42 tylli kini ki karkhana heiwa kiwa da paan NOC da em ki 50 tylli hapoh ka ri-loom Jaiñtia. Katwa ka MSPCB da ong ko wa da em 50 tylli ki karkhana kiwa da sdang ha ri-loom Jaiñtia iwa mut wa da em kiwa da leh khlem da yoh NOC naka JHADC. Wei na kini ki 42 tylli da em du 8 tylli kiwa da yoh Trading License naka District Council.
Da kdaw leh yeiwa jia ha ki karkhana kam ka M/s Syrpailang Coke waka M/s Jaintia Coke Industries wa da dep lai pait lai sylli da u DC warim kiwa em ha Sookilo ki wym em bood kyndon katkam ka CTO (Consent to Establish) deiwa pynlait yei jakhlia khlem da pynkhooid chwa wei hadien wa phah u DC ya ka bui (Report) cha ka MSPCB yow leh yeiwa emkaam tangwa kini ki karkhana dang pteiñ hi ki wow krehkaam deiwa booh hei maa ya kiwa chong chnong, da ong ka ECC.
Heiyatoh waka The North East Carbon wa mantre da u Montri ka sorkar jylla, u Renikton Lyngdoh Tongkhar kawa da yoh yaka CTE waka CTO iwa mut da yoh bor wow chna kamjooh wow pynkrehkaam, ka ECC da pyntip ko wa dang mantre hi da u Montri hanla da dep u wow kular wow dam noh wow emkti ha kani ka karkhana.
Katkam ka RTI wa da yoh ka ECC naka Meghalaya State Pollution Control Board (MSPCB) da em 50 tylli ki karkhana Coke du ha East Jaiñtia kiwa da yaleh wow yoh u krehkaam. Heiwa na kini ki 50 tylli da em 14 tylli kiwa da yoh bor du wow sdang u chna donhi wei 12 tylli na kini da yoh bor ki wow sdang krehkaam (5 tylli kiwa dang paan bor wow pynthymme ya ka CTO).
Na ki 50 tylli, 29 tylli toh kiwa da chah kyntait dei wym em yoh bor wow sdang lane wow leh iyi iyi wei da em 5 tylli kiwa da paan bor wow sdang chna tangwa ym pu em e ya ka rai katkam ka RTI wa da e jubab ha ka 21-01-22.
