Ka Shillong Press Club (SPC) da pynsñiaw ko yei sñiawkhia yeiwa jia ha lait ka yung krehkaam ko ynne ka sngi heipor kamwa 1:00 waje heiwa da em ki dkhot ka Hynniewtrep Youth Council wa ki pulit kiwa da yalang neidaw wa em ka Press Conference wa da khut da ka Bramachari Mukundanand kiwa mihkhmat ya ka Jagatguru Shankaracharya Swami Avimukteshwaranda Saraswati.
Ka Shillong Press Club da ong ko wa ka kam ka Club toh kawa laitlooid wei ym em yachah ko ya kiwon kiwon deiwa pait ya ka jaitbru, ka niam, ka riti dustur wei waroh toh kiwa ye wow wan pynman ya ka Press Conference yow klam ki hajrong kawon kawon ka phang.
Da ong wa ini i em ki pulit wa kiwa yahkhmat ka seiñbhalang da ktah ko yei pyrtuid ka Shillong Press Club hadooh wa chah pynbaad ka Club wa pyndam ko ya kani ka Press Conference.
Kamtæ ka SPC da pynche ko wa ya kani ka Press Conference da pyndam da ki Bramachari Mukundanand chwa wa toh u pynman noh.
Hadien wa yoh u yaklam u President ka SPC, neiliang u ki heh ka HYC da pyntip ki wa i rai wow wan cha ka yung krehkaam ka Shillong Press Club toh yow pyrchah yei thmu kani ka seiñ wow pynman Rally ha Shillong wa tip kam ka Gau Dhwaj Sthapana Bharat Yatra yow pynbna ya ka masi kam ka Mother of the Nation. Tangwa ym em tip yeini neibhah ha ka chithi wa phah cha ka Press Club ym em ong yeini.
Chooh chooh da pynche wa ka Shillong Press Club ym jooh em ong ko kiwon kiwa hoi u e Press Conference wei ynne neiliang u President ka SPC da Phone u cha ki dkhot ka Jagatguru Shankaracharya Swami Avimukteshwaranda Saraswati yow kylli yei daw wa slem ki wow wan wei ini wa chah pynbaad toh wa chah pyndam ki toh kawa khlem yurim.
Discussion about this post