Shillong: Ka yungbichaar wa khlieh dooh ka ri ka Supreme Court ynne ka sngi hawa sylli ko ya ka mukotduma (petition) wow hukum ya ka sorkar pyrdi wow tipmit ya ki Hindu kam ki khian paaid (minority) ha ki phra tylli ki jylla da ong ko wa kani ka mukotduma emkaam wow phah cha ka National Commission for Minorities wei da phah ya uwa ujor wow lai cha kani ka Commission.
Kani ka mukotduma Public Interest Litigation (PIL) da dawa wow tipmit ya ki Hindu kam ki khian paaid ha ki phra jylla kiwa kynthup ya ka Jammu and Kashmir, Punjab, Lakshadweep, Mizoram, Nagaland, Meghalaya, Arunachal Pradesh wa Manipur.
Ya kani ka PIL da ujor da u muktiar wa tip kam u Ashwini Kumar Upadhyay wei man u leh kam u wa ektien ya ka seiñ BJP ha Delhi.
Da ong u wa ka sorkar pyrdi da e ko hadooh 20,000 tylli ki scholarship cha ki khynnah puræ deiwa kam wa ha ka jylla Jammu and Kashmir ki Muslim em ki 68.30% wei ka sorkar e ko 717 na ki 753 tylli ki scholarship cha ki khynnah Muslim tangwa ymtoh ya ki khynnah Hindu.
Katkam ka hukum (Notification) ha u snem 1993 na ka sorkar pyrdi da ong ko wa ki Muslim, Christian, Sikh, Buddhist wa ki Parsi u tipmit ya ki kam ki khian paaid hapoh ka ri wei ya ki Jain nawon da tipmit ha u snem 2014.
Da ong u leh wa katkam ka 2011 Census, ki Hindu toh u man ki ki khian paaid ha ki jylla kam ka Lakshadweep (2.5%), Mizoram (2.75%), Nagaland (8.75%), Meghalaya (11.53%), J&K (28.44%), Arunachal Pradesh (29%), Manipur (31.39%) wa Punjab (38.40%).
Discussion about this post