Neiliang yong ka Synjuk Ki Khynde Wahehchnong Area Nongjngi da kwah ki wow pynche hawa yatoh wa ka khubor wa mih heiyatoh wa u Donlad Shylla wa ym em yatoh ki iyi iyi leh wa oo.
Ka Synjuk da ong ko wa hei thooh yutip ko wei deiwa yaklam wa u Waheh Chnong ka Ksehrynchang wa u Donlad Shylla toh uwa na ka chnong Mukhla wei da chongkha u ha ka chnong Ksehrynchang, Elaka Nartiang wei katkam wa da em wa thoh khubor wa neiliang yong u SP ka East Khasi Hills District, da yoh ki wow kem ya u Donlad Shylla ha ka thaaiñ Nongjngi wei katkam wa thooh yutip yong ka synjuk deiwa yaklam wa u OC yong ka Nartiang Police Station da kem ya u Donlad Shylla ha Namdong-A, Lad Thadmynri, Elaka Nongjngi, ym toh ha ka chnong lane thaaiñ Nongjngi.
Ka Synjuk da beiñ joor ko yei thoh khlemakor yong u Donlad Shylla ya i man i rynyieñ yong kaDC ka East Khasi Hills District wei ha i jooh i por da beiñ joor ya kiwon kiwon ki kaam damok, heijooh i por da kyrpaad ya kiwa thoh khubor wa hawa thoh wei pynmih khubor wow sñiawbha wow thooh chwa yei sakhiat, neibhah da pynmih khubor klumar ya ki khubor iwa da pynbood naam ya ka thaw kiwi, pynkut ka kyrwoh na u Ebormi Pale, President wa u Arsuk Tyngkra, Secretary Synjuk ki Khynde Waheh Chnong Area Nongjngi.
