U khon u Shah Rukh Khan, u Aryan Khan (23) snem uwa da man kam uwi wa da em hakhmat dooh hei chah takit wa ki kaam wa yatoh wa i drugs, daw neh biang u hapoh patok hadien wa ka yung bichaar Narcotic Drugs and Psychotropic Substances (NDPS) Court da kyntait ko yei yaleh yoh jamin u heiyatoh wa i chah kem ki bru deilang wa oo napoh kawi ka jhaad (Cruise Ship) na duriaw hajan Mumbai wa suba wa pynemkaam drugs ki.
Kam wow pynkynmoo wa ya u Aryan da kem da ki pulit nadooh ka 3 tarik uni u bnai wei da chah kset patok u hapoh ka Arthur Road Jail, Mumbai nadooh ka 8 tarik uni u bnai wei heiyatoh wa ini i kaam da em la 20 ngut ki bru.
Ka yung bichaar da kyntait ko wow e jamin ynne ka sngi heiwa ki muktiar u Aryan da ong ki wa ym em chem drugs ha oo tangwa neiliang kiwa takit da ong ki wa biang sabut wow pynoo wa uni u khon u Shah Rukh emyatoh u wa kiwa dai drugs na baar ri wei ya kini ki bru da tipmit u ki da boon snem.
Kamtæ ki muktiar da rai ki wow lai rah ya ini i kaam cha ka High Court.
Da chah kyntait leh wow yoh jamin kiwi de kiwa da chah pynbaad ha ini i jooh u kaam wa kynthup ya u Arbaaz Merchant wa Munmun Dhamecha.
Ya u Aryan Khan da pynngat hapoh ka Section 8(c), 20(b), 27, 28, 29 wa 35 ka aiñ NDPS Act.
Ka Narcotics Control Bureau (NCB) Mumbai kam ka sabut da pynyoo ko ya ki WhatsApp Chat u Aryan iwa da kam toh iwa pynyoo wa yaklam u wa ki bru wa dai drugs.
Ki bru ka NCB da lai kynreh ki ya ka jhaad Cordelia Cruise Ship kawa lai cha Goa ha ka 2 tarik hadien wa pyntip wa em ki bru wa leh muja deiwa pynemkaam drugs.
