Ka yung dorbar chna-aiñ ynne ka sngi da kyntait ko wow mynjur ya ka rai (Resolution) wa da wanrah da u MLA ka KHNAM na North Shillong, u Adelbert Nongrum, hajrong ka phang wow pynkylla namo wow pait bniah biang ya ka aiñ bhah kreh namo ka Reservation Policy ka jylla.
Hawa klam hajrong katai ka Resolution, u Montri Rangbah ka jylla, u Conrad Kongal Sangma da ong u wa ka jylla Meghalaya man ko kawa khian bha, wei i bhah kreh neibynta ki jaitbru ri-loom wa ki khian paaid ha ka jylla kamwa da pynyoo na ka rai (Resolution) yong ka 12-01-1972 man ko katkam ka Clause 4 yong ka Article 16 ka riti synchaar ka ri.
Da ong u wa ka aiñ bhah kreh bhah kaam da lai bait ko neibynta ki jaitbru ka jylla wot hadien wa ka jylla da kynjoh ko 50 snem, wei da ye wow bhah ya ki wakreh ha waroh ki chnat krehkaam ka sorkar. Da ong u wa ka aiñ bhah kaam man ko kawa kyllaiñ kawa emkaam wow hap pyrkhat sani bha hachwa wow leh iyi iyi heiwa da pynrap u wa kani ka phang toh kawa rap khia bar ya iwa da yoo.
Neiliang u Adelbert Nongrum uwa da wanrah ya kani ka Resolution, da kyntait u wow pyndam noh ya kani ka Resolution, heiwa neiliang u Lamphang (Speaker) katkam ki aiñ pynlai dorbar da chim noh u da ka rai yong ka yung dorbar chna aiñ wow chim da ka Vote, heiwa ka sur kiwa bon da sawa ‘No’.
Hachwa wow chim ya katai ka rai wa khaddooh da yoh leh i klam wa i e yumut da kiwa boon ki MLA kiwa kynthup ya uwa yahkhmat ka liang pyrchah, u Dr. Mukul Sangma uwa da ong wa ya kiyi kiyi ki phang kiwa ktah ya ki paidbah toh u wanrah yaklam ha ki seiñ saiñpyrthai.
