Ki MDC yong ka BJP ha JHADC da ong ki wa i klam yong u Chief Minister u Conrad Sangma wa em i piah hapoh ka Party BJP Meghalaya, man ko iwa bakla neibhah toh i kaam yung, kaam sem yong ka Party BJP, ym toh yong ka NPP.
Da ong ki wa ye wow man wa u Chief Minister ka Meghalaya da mylliñ u wa oo leh toh u National President yong ka National People’s Party wei da poi klam u cha ki kaam yung yong ka Party BJP Meghalaya, heiwa da kam u wa ka Party BJP Meghalaya da em ko hapyrdi i piah i pra wei chiteiñ na ki dkhot yong ka Party da kwah ki wow pyndam noh ya u Arnest Mawrie kam u President ka BJP Meghalaya.
Ki MDC da pynche ki wa kamwa man katni, ym em iwon iwon i ya piah ya pra hapoh ka Party BJP kamwa da klam u Chief Minister deiwa kylli kammon leh tip u yei kaam yung ka Party BJP hawa oo ym toh u dkhot yong ka BJP, kamtæ da ong wa i klam yong u Conrad Sangma toh du kamwa khlam ke ki khynnah ya i kaam yung kiwi.
Ki MDC da ong ki leh wa katkam i chem yong ki, u Arnest Mawrie kam u President man u uwa biang tam wow yahkhmat ya ka Party BJP hapoh Meghalaya katni, uwa klam yei sakhiat wei uwa nood wow pynyoo pyrthai yei leh tooh ha GHADC wa JHADC, ha i jooh i por hajrong i khayi mooyong pyrchah yaka aiñ hapoh ka jylla.
Ka khubor na u Dawan Lyngdoh, MDC, u Krison Langstang, MDC wa na u Lakhon Biam, MDC.
