U Montri Rangbah ka jylla, u Conrad K Sangma da ong wa ka kynhun takit laitlooid hajrong i pynbaad baam-tooh ya u khoo ym em da pynslem næ leh suki kajiak leh, tangwa da paan por chooh chooh ko na ka sorkar neibhah wa man ko kawa yaar wei hap wow booddien bniah wei emkaam leh wow yoh chiboon i tip.
Kam wow kdaw wa ka kynhun takit wa da thung da ka sorkar hajrong i pynbaad baam-tooh ya u khoo wa da yoh khyrrup na kawi ka kudam ha Boko, Assam da pynmih ko wow pynbna paidbah wow chong bichaar ha ka 9 wa 10 tarik uni u bnai ha Pinewood Hotel, Shillong.
Katkam i pynbna paidbah neiliang ka kynhun takit da kyntu leh ya kiwon kiwon kiwa tip hajrong itai i kaam wa ye ki wow pyntip cha ka kynhun takit wa khlieh da u Rtd. Justice Mool Chand Garg.
Hawa kylli, u Montri Rangbah da ong wa hei yong sakhiat ya kawon kawon ka kynhun takit da e por 3 bnai wow pyndep wei wow phah ya ka Report cha ka sorkar, tangwa em ki takit kiwa hap wow lai leh hadooh 2 snem wei i pynyinsur por wa da paan da ka kynhun takit ym toh iwa eh, tangwa da ong u leh wa ka sorkar ka kwah ko wow takit deiwa pyndep rap smat katwa ye.
Hawa yatoh wa i thung ya ka Chairperson wa thymme yong ka Meghalaya State Commission for Women, neiliang u Montri Rangbah da ong u wa ka sorkar da dep ko wow pynbiang lut yei emkaam wei daw pynbna hadien kattu katni por.
