Khliehriat : Ka Southern Border Youth Welfare Association (SBYWA), kawa haap hapoh ka Elaka Rymbai-Lakadong, East Jaiñtia Hills District da lai yachem ko markhmat wa ka Dr. L. Passah, DM&HO Khliehriat hei yatoh wa ka Bataw PHC kawa ym em Doctor de hadooh katni kawa booh ko yei eh i khoo ya ki paidbah yong ka thaiñ.
U N.L. Talang, General Secretary, SBYWA da pynap u yei sñiawkhia hei yatoh wa ym em Doctor de kani ka PHC kattu la 7 bnai nadooh wa lai puræ u Doctor wajooh em ha ka.
Neiliang ka Sorkar lyngba ka Health Department da dep thung ko na u Naiynñiaw (July) da u Dr. C. Shylla wa na Byndihati kam u Doctor wa pura yong ka Bataw PHC tangwa uni u Doctor da kyntait u wow lai kreh iwa da pynkulmar ya ki paidbah khamtam yei leh ka sorkar.
Ka seiñ SBYWA won da kylli ko wa “Wei leh uni u Doctor thap u ya ka kani ka post heiwa ym em mon u wow kreh cha ki thaw nongkyndong kiwa booh ya ki paidbah ha kam ini i chitom.”
Neiliang ka Dr. Passah da ong ko wa ka da dep thoh kot ko cha ka sorkar hei yatoh weini khamtam wow phah Doctor da uwi tangwa hadooh katni ym pu yoh jubab na ka sorkar.
Ka SBYWA leh da pynsñiaw ki ha ka Dr. Passah sa yei wym em light hapoh ka Bataw PHC nadooh wym em de krehkaam u Transformer, yeini ka seiñ da dep boodien ko deiwa yachem wa u M. Patlong, E.E. MeECL Khliehriat wow kylliang ya utai u Transfomer tangwa ka ophis da kyntait ko neibhah wa kani ka PHC da sah ram ko hadooh T. 10 Lak tam katwa kamtæ u ma Patlong da thoh u cha u Sub-Divisional Officer Jowai, West Jaiñtia Hills wow su chwa tang 30% yow kylliang ya u Transformer tangwa hadooh katni ym pu em su ki ya ka tai ka poisa.
Kamtæ neiliang ka seiñ SBYWA da rai ko leh wa daw yachem ko wa ki Montri sorkar ha u snem thymme hei yatoh wa ini waroh.
Discussion about this post