Ha ka kyrwoh khubor wa da phah da u George B. Lyngdoh, MLA ka Umroi uwa man leh kam u Vice President, AITC Meghalaya da ong u wa ha kini ki sngi ki tayaw da mih ki khubor wa oo deilang wa kiwi ki MLA daw mih noh ki napoh ka All India Trinamool Congress (AITC) yow psiah cha kiwi ki Party.
Heiyatoh wa ini da kyntait u ya ini waroh neibynta yong oo kamjooh leh kiwi ki MLA ka AITC deiwa ong wa da yoo chutia ki khubor wa mih kamjooh leh man ki kiwa yahbakla deiwa pynrap wa da em ki Party kiwa da wan tyrwa ya oo da kiwa boon ki jait kamjooh ki kular wei ini toh da jia i ha kini ki bnai wa dadep, “Ini pynyoo ko wa hadooh katwon ym em kheiñ burom ki pyn ya kiwa yahkhmat yong ki hi kamjooh ya kiwa kyrchaan yong ki wa da man ki kiwa da pynkhreh u pdiang ya uwa yahkhmat kamjooh u MLA yong kiwi,” da ong u George.
Da ong u leh wa ini i wan phon ki toh yow pynsuki yei sur yong kiwa yahkhmat deiwa pynmylliñ ya ki kaam wa emkaam, ki kaam pyrchah aiñ wa i wym biang ka synchaar khadar hapoh ka jylla wa da ktah ya kiwa chong chnong katni hapoh ka sorkar wa katni.
“Nga chim ko ya ki kaam synchaar paidbah kam kawa kyntang yow pynmankaam yei angnood ki paidbah yow man leh i sur yong ki wa i dur yong ki. Ym em kwah i ya kawon kawon ka chuki hapoh ka Secretariat lane iwon iwon wa chah phon. I da wan i heini yow pynmih yei sur pyrchah ya ka sorkar wa ki kaam wym man i yong ka.”
U George da ong u leh wa ka sorkar ha Meghalaya toh kawa da sdang oor wot ha ini i por. “Da yoo i yei synchaar bakla man-ka-sngi da waroh kiwa em hapoh ka Meghalaya Democratic Alliance, kiwa da hap wow bahkhlieh ya ini waroh, kiwa da pynsih yei pyrtuid wa bha ka Meghalaya iwa da pynbha pynmiat da kiwa boon snem.”
Da ong u leh kam ka liang pyrchah hapoh ka Meghalaya, ka AITC daw pteiñ ko wow klam pyrchah ya kiwa leh sih ka sorkar kam ka sur yong kitu wym em sur.
Kamtæ da ban joor u wa waroh ki khubor wa da mih, wa daw mih noh u napoh ka AITC yow psiah cha kiwi toh kiwa bakla, kiwa khlem yurim, kiwa thok wei kiwa yahbakla wei oo hi u neh bait u hapoh ka AITC, wei ym em thmu u wow psiah cha kiwon kiwon ki Party.
