Jowai: I pyndam ka Kasari wa khliehdooh dooh ka ri India, ka Supreme Court ya ka Section 377 IPC da pynman ko ya ki bru ki wymtoh ki chynrang næ kynthai wow lehkmen ki ha waroh kawi ka ri kamjooh ha sor Shillong, kini ki bru da pynman ki yei lehkmen ha ka 14 tarik uni u bnai ha Madan Iewrynghep heiwa uwi u khynnah chynrang wa dang 17 snem na ka chnong Mawkawah, Nongstoin da chah pynbiej u wow kylla kynthai wei wow chim bynta leh ha katai ka lehkmen.
Hawa yaklam wa uni u khynnah wa khut sin kam u Hep da ong u wa ym em man u kam utæ uwa man kam ka kynthai, da phla u wa da chah pynpynbiej u wow kylla kynthai wei da pynbor leh ya oo wow klam wa kiwa pathai khubor ha kani ka lehkmen iwa da poor smat lyngba ka Internet.
Uni u khynnah uwa da dam skur wei uwa pyndep ya ka Class 6 wei da sah u ha Shillong wow khih mylla, wei kreh u ha kawi ka dukan ha Laitumkhrah.
Da ong u wa ha Shillong hawa sah u ha kawon kawon ka chnong da tip ya oo kam u chynrang, tangwa hadien wa sah u ha Shillong da yatoh lok u wa ki kattu katni ki wymtoh ki kynthai næ chynrang kiwa da yalam bakla ya oo.
U Hep da pynsñiaw u yei silet hajrong ini i leh wa i klam yong oo wei da kam u wa da bakla u wei da pynsñiawsih u ya kiwa ha yung yong oo.
Ki dkhot ka Seng Samla Shnong Mawkawah kiwa kynthup ya u Moslandar Marngar uwa man leh kam u Treasurer ka seiñ da ong u wa kam ini i yah bakla, ka seiñ beiñ joor ko ki neibhah wa kam kiwa yahkhmat ya ki seiñ ha sor toh u man ki kiwa chemphang bar ya kiwa na nongkyndong tangwa da em ki yei mynsien wa sih hadien wa da phla uni u khynnah.
U Marngar uwa man kam u Secretary ka chnong da ong u wa katkam ka khubor wa ki Video da man kaamke hi-eh ki neibhah kam u waheh na ka chnong tipmit bha u ya kiwa chong chnong.
U Marngar da beiñ joor u leh ya kam kini kiwa pynman blang kñia ya ki khynnah deiwa kyntu ya ki bor kiwa hajrong wow tih tre ki hajrong ini waroh.
Discussion about this post