U Montri ka chnat Tourism, u Paul Lyngdoh da kyntait u wa iwa jia ha ka sngi sdang ka Cherry Blossom Festival heiwa da em uwi uwa yah thuk-thuk da khlaad u toh neidaw wa em katæ ka “VIP Culture”.
Da khana u wa ha katu ka sngi da em boon bha ki VIP kiwa da yahkhmat da u Montri Rangbah ka jylla wei ka kari yong oo toh kawa bood hadien ka kari u Montri Rangbah wei da hap ki wow poi thaw heipor 6:30 tangwa da ye ki wow poi heipor 6:45.
Chooh chooh da ong u wa ha katu ka janmiet da em boon bha ki bru kiwa lai luti hadooh wa poi i por wa sangeh lut ki kari wei ym lait de wow lai wei kammon em laad ki kari pulit u pynhær wei wow tyrrah ya kiwi, neibhah wa hap ma hap sangeh ki heipor wa lai luti ki.
Kamtæ da ong u wa kiwa yah thuk-thuk ki rap lait ki u lai wei ki toh kiwa ye u pynhær deiwa lai tyrrah ya ka kari sorkar wei hadien ini won wow chah tyrrah ha kawi won ka kari, wei da ong u leh da em kiwa khana ya oo wa jia kamtæ hi.
Da pynche u leh wa da em ki kyndon namo ki Protocol wa hap wow bood manda wan ki Montri ka sorkar pyrdi wei kam kiwa napoh ka jylla toh u poi ki heipor wa biang khlem da pynthut ya ki paidbah.
Heijooh i por da ong u iwa jia toh iwa sñiawsih wow dooh yei mynsien bru tangwa da ban joor u wym ye u man wa kawon kawon ka kari pulit u tyrrah ko ya uwa yah thuk-thuk neibhah ki da hap ki wow sangeh wei manda lai leh toh suki bha.
Discussion about this post