U Synshar Khymdeit uwa da chah pynbaad wa dawa poisa hei pyrtuid ka HNLC da ong u wa ym em bynta u iyi iyi hajrong itai i mih khubor wei ymem yatoh u iyi iyi wa u Chairman warim ka HNLC, u Julius Dorphang næ wa kiwon kiwon ki seiñ.
Da khana u wa oo toh uwa dang 25 snem i rta uwa man u tre chnong na Mawhati wei uwa mylla sngi, wei da khana chooh chooh wa ha Mawhati yajan chnong donhi u wa u Julius Dorphang.
Hajrong itai i mih khubor, da ong u wa nyngkong dang pyrkhat u wa ye u man wa toh ka khubor kaam ke.
Da khana u wa hadien wa mih katai ka khubor neiliang yong oo leh da lai mih u cha ki pulit wow ujor FIR heiwa neiliang ki pulit leh da kular ki wow kdong ya ki bru wa emkti.
Neiliang u payu u Kyrshan Khymdeit da ong u wa ini toh i pynemkaam bakla yei pyrtuid u diah u neibhah ym jooh embynta u ha kiwon kiwon ki kaam wa sih.
Neiliang ka HNYF, East Khasi Hills deilang wa u Synshar da pynche ki ynne ka sngi hajrong katai ka khubor kawa da pynbaad wa u Synshar da dawa poisa u hei pyrtuid ka HNLC.
U President ka HNYF, u Bless Dkhar da ong u katni uni khynroo da em u hapyrdi i maa wei toh ka kaamram yong ka chnat pulit wow pynbiang yei yada ya u Synshar wei wow kdong leh ya ki bru kiwa emkti ha ini i kaam.
Kam wow kdaw heini da em kiwa phah khubor wa da pynbaad wa u Synshar toh uwa man kam u Area Collector ka HNLC wei da dawa u T. 15 lak na kawi ka manbei wa em dukan ha Iewduh, Shillong kawa da su T. 4 lak neidaw wa da chah maham wow siat wei yei dawa poisa da phah u ha ka chithi ka HNLC wei da lai ujor noh ko cha ki pulit hadien wym ye de u su.
Wei ha ka khubor wa da phah kiwa pynbaad da ong leh hadien wa da booddien ki ya uni u bru da tip ki wa uni ymtoh u Area Collector ka HNLC tangwa dang emyatoh u wa u Julius Dorphang wei kani ka poisa wa da dawa toh yow yarap su yaka kuna wa T. 15 lak wa da daiñ kuna da ka High Court ya u Dorphang uwa man leh kam u MLA warim ka Mawhati hadien wa da phah kset ya oo leh 25 snem hajrong ki kaam slaitbor ya kawi ka khynnah.
Discussion about this post