Shillong: Ka jylla Asssam da pteiñ ko wow tia pood wei ha kani ka kynti ha ki thaw dem ki sim Amur Falcon kiwa da riñ ya ki paidbah ha ka thaaiñ Umru wa Tyrso wa haap ha ka Mawhati Constituency, Ri-Bhoi District kiwa em ha khappood Meghalaya-Assam.
Uwi na kiwa yahkhmat ka thaaiñ uwa man leh u Chairman ka Tyrso Valley Wildlife Protection Society (TVWPS), u Alos Nongpoh da ong u wa i wan kini ki sim ha ka thaaiñ da riñ ko ya ka sorkar Assam kawa da wanrah ya ki kaam pynroi ha ka chnong Umru deiwa chna sarok wa ki thaw sah Guest House.
Da ong u wa ini i kreh da sdang i na u Naiynñiaw uni u snem, tangwa da sangeh i nei pyrchah ki seiñbhalang wei da pteiñ biang i nadooh uni u bnai.
Da ong u wa hanlada ka chnong wa ki seiñbhalang pyrchah ki yei leh ka sorkar Assam, tangwa tlot ki neidaw wa ki bot pulit ka Assam rap khlan ki bar ya ki pulit Meghalaya.
U Nongpoh da pyntip u leh wa kiwa chong chnong ka Umru em ki palat 200 yung wei boon na ki hi toh ki jaitbru Nepali ki wym yoh EPIC na Meghalaya tangwa pynpsiah pyrtuid ki ha Assam.
Da lyntip u leh wa ka sorkar Assam jooh tympra ko yei kreh ka sorkar Meghalaya ha ka thaaiñ wot ya ki yung sah ki bru samen leh ym maap ko.
“Hajrong u sarok ka sorkar da chna leh ya ka Entrepreneur Felicitation Centre (EFC) kawa kynjoh T.1.17 klur wei i chna ya kani ka thaw esikai da lai i chakhmat hadooh katni wei da yoh i leh ya ka poisa na ka tnat Tourism kawa da e T.34 lak wow chna ya ka guest house yeiwa i kreh dang lai i chakhmat,” da ong u Nongpoh.
Ha iwi i liang, ka Tyrso Valley Wildlife Protection Society (TVWPS) da pynkhreh ko wow pynman ya ka tamasa Amur Falcon kawa soo ha ka 7 wa 8 tarik u bnai wow wan ha ka madan Tyrso Pyllun, Ribhoi District wow kyntu ya ka kaam uiñke suwari ha ka thaaiñ.
Da pyntip u wa kini ki sim u em ki ha kani ka thaw kamwa chi bnai tam, wei ha uni u snem daw pynman ya ki yakob wa ha rukom nadooh ka 21 tarik kam ka Football, dro dur wa kiwi kiwi.
Discussion about this post