Jowai : Ka seiñ All Hynniewtrep People United Front (AHPUF) ynne ka sngi da lai e dorkhat ko cha u Deputy Commissioner ka West Jaiñtia Hills u R. Rapthap.
Ha kani ka dorkhat da thoh chaphang ki wire light kiwa lai na uwi u chrot ha uwi tawon kiwa lai narood sarok tymbud ka Jowai wa boon ki bru wa lai wa wan.
Ka seiñ ha kani ka 6 tarik uni u bnai da e dorkhat ko leh cha u Chief Executive Officer ka Meghalaya Power Distribution Corporation Limited (MePDCL) hei yatoh wa ini.
Da ong ka seiñ wa lada tkut kini ki wire daw haap bait ki ha ki bru iwa ye u wanrah ya i jia wa sñiawsih wot hadooh wow dooh yei mynsien bru.
‘Dei langær yoo i yei tkut ki wire heiwa da yap ki mrad kamjooh leh da dooh ya ki mynsien bru wa kiwi kiwi’ da ong u President ka seiñ u J. Phawa.
Kamtæ da dawa ko wa ha kam kini ki thaw wa boon ki bru emkaam u booh da ki jaar ha wah ki wire næ u thap ya ki wire ha ki pipe plastic neibhah lada jia wa tkut yow lait na iwon iwon i jia wa sñiawsih.
Da dawa nyngkong ko wow leh chwa yeini ha tymbud u sarok na H.K. Singh Memorial School hadooh ha St. Mary Mazzerello Higher Secondary School.
Discussion about this post