Jowai: Ka All Jaiñtia Students Union (AJSU) Seiñbei hei yakhmat u President u Lucky Phawa deilang wa uwa e buit ka seiñ u El Nathan Pale da li e dorkhat ki cha u Hon’ble Justice Brojendra Prasad Katakey, u Judge warim Guwahati High Court ha yungkrehkaam ka Divisional Forest Office Shillong, haka 11 tarik uni u bnai.
U Justice Brojendra Prasad Katakey toh uwa khlieh ya ka NGT Committee deiwa emlang ki dkhot ka Central Pollution Board wa ki dkhot ka Indian School of Mines kawa da pynkit ha ki wow pynkhreh wow booddien yei pynkrehkaam ya ka hukum ka NGT.
Kani ka Committee toh kawa da seiñ nadooh ka 31-08-18 wei u kut i krehkaam ko ha ka 28-02-19, kamtæ neiliang ka seiñ ha ka dorkhat da ong wa kattu la soo bnai kani ka Committee ympu em leh ko iyi iyi leh wow yarap ya ki bru kiwa chah ktah ha i tih mooyong khamtam ki um ki wah kiwa da kylla bih.
Ka seiñ leh da ong ko wa da em chwa ka poisa wa T. 430 Klur kawa da booh kyrpang neibynta ka rymaw yow pynim pynbha biang ya ka rymaw, kawa ye u pynemkaam yow pynwiar yei kylla bih ki um ki wah kiwa da ktah bha ya ki bru wa pynemkaam ya kini ki um tangwa hadooh katni ympu em leh ya ini.
Kamtæ ka seiñ da kyntu ko ya kani ka Committee wow leh smat ya ini neibhah ka poisa toh kawa da em chwa emkaam sadu wow pynemkaam ko yow yoh myntoi ki paidbah.
Discussion about this post