Kyntu ka AJYWO ya ki Dorbar Chnong wow man kiwa husiar hawa e RC wa ya ki Seiñ Kur wow syndong ya ka Kur

Jowai: Ka AJYWO Central Body, da kyntu ko ya ki Dorbar Chnong waphær waphær yong ka ri Jaiñtia wow man kiwa husiar bha hawa e ya ki Residential Certificate khnang wa kam kini ki jait Certificate wa emkaam ym poi ki cha ki kti yong kitu ki wym toh hok sakhiat wow yoh ki.

Ha i jooh i por, ka AJYWO, da kyntu ko leh ya ki Seiñ Kur waphær waphær ha ri Jaiñtia wow man ki kiwa paitbniah ya ki jar jiar ki kur khnang wa ym em kiwi ki jaitbru kiwa pynemkaam bakla ya ka kur ka jait Pnar yong i.

Katkam wa yoh yutip yong ka seiñ, em ki kattu katni ngut ki bru ki wym toh naka jaitbru Khasi-Pnar kiwa em yaka Electoral Photo Identity Card (EPIC) deiwa chim ya ka jait lane kur ki tre ri yong i. I yoh EPIC yong kiwi won ki jaitbru deiwa chim ya ka kur ka jait ki jaitbru yong i toh na i daw wa yoh Residential Certificate yong ki wei ini daw ktah ko yaka jaitbru khian paaid yong i hadien ha bood.

Ki Dorbar Chnong yong i, em ki ka bynta kawa khroo bha hei wow yada ym du ya ka chnong wot hadooh yaka jaitbru, wei na ini i daw i e Residential Certificate man ko kawi na ki laad ki luti wow yada ya ka jaitbru yong i.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ki Seiñ Kur yong i leh, em ki ka bynta kawa khroo bha hei wow yada ym du ya ka kur ka jait hadooh yaka jaitbru leh, kamtæ i kitkhlieh ki Seiñ Kur ya ki jar jiar ki kur man ko leh kawi na ki luti wow yada ym du yaka kur ka jait yong i ya i man khooid wei kyntang yong ka, pynkut ka kyrwoh na u M H Dkhar, President AJYWO Central Body.