Ka Confederation of Meghalaya Social Organisation (CoMSO) dayachem ki wa u Lamphang ka yung dorbar chna aiñ ka jylla, u Metbah Lyngdoh wow yaklam hajrong i dawa ya ka Inner Line Permit (ILP) wei khamtam wow kyntu ya u Lat ka jylla wow e ya ka muhor ya ka Meghalaya Residents Safety and Security Amendment Bill (MRSSA).
Hawa yaklam wa kiwa pathai khubor, u Chairman ka CoMSO, u Robertjune Kharjahrin da pyntip u wa neiliang ka CoMSO da pynsñiaw u leh ha u Metbah ya i pyrchah ya ka Citizenship Amendment Act (CAA).
Da ong u wa i yachem wa u Metbah ymtoh wa man u kam u Lamphang, tangwa kam u President ka United Democratic Party (UDP) uwa man leh kam u Chairman ka Regional Democratic Alliance (RDA) kawa man ka dhab ki ar tylli ki seiñ saiñhima ri-loom.
Da ong u wa i yachem man i leh wa ka dorbar chna aiñ ka jylla dadep mynjur ko ya ka Resolution hajrong ka ILP, wei kani ka phang ym man ko du i kaam ka sorkar, tangwa yong waroh 60 ngut ki MLA ka jylla.
Da ong u leh wa ka ILP toh i kaam ka sorkar pyrdi, tangwa ka MRSSA won yong ka sorkar jylla, heiwa da pyntip u wa neiliang ka CoMSO da ban joor ko ya kiwa yahkhmat ka seiñ ri-loom wow kyntu u ya u Lat wow e noh ya ka muhor ya kani ka aiñ neibhah wa da yajan bha ko wa ka ILP neibhah wa ye wow pynkrehkaam ya ka da ka sorkar jylla.
