Ka DC ka Ri-Bhoi District da kyrpaad ko ya ki paidbah deiwa pyrkhat yei poi ka samoi lehkmen Christmas deiwa kdaw wa kattu da em chi snem chiteiñ wa da yaleh pyrchah ya ka khlam COVID-19 hiewa kiwa da dep chah ktah da em ki palat 80,000 ngut wa kiwa yap palat 1390 ngut hapoh ka jylla waroh kawi
Kamtæ da ong wa ko wa kani ka khlam da ktah ko ya waroh nadooh ka khayi pateiñ, ka puræ puthi wa ka imlang sahlang wei deiwa lai i por, suki suki da sdang poi i rukom im kam nachwa tangwa da khuslai yei rukom man ki bru wa kheiñstiñ, ki wym bood kyndon wei kiwa artatien wow chim yei tika yada na u COVID-19.
Ka DC da ong ko wa i tika toh iwi na i laad yaleh pyrchah ya ka khlam tangwa da man ko i khuslai lada ym wan wow chim yei tika neibhah ha kini ki bnai wow wan da man ko leh ka samoi lehkmen wei wow lehkmen Christmas.
Ka DC da pynknymoo ko leh wa da em 84 sngi i por wa da booh wow yang yow chim yei tika wa ar hadien wa yoh yei sien wa nyngkong, kamtæ emkaam wow pyrkhat ya ini yow chim smat yei tika yow yoh u lehkmen kamwa jooh ha kini ki por.
Da kyntu leh ya ki paidbah wow pyrkhat bha ya ini neibhah i tika man i kam chibynta wow yada na kiwi ki jia yow lait na iwon iwon i jia wym poi pyrkhat na ka khlam.
