Jowai: Ynne ka sngi u Symbood Waheh Chnong ka Dorbar Shnong of Umkiang, East Jaiñtia Hills, u Kynjaimon Amse da phah dorkhat u cha u montri rangbah ka jylla wow pynduna ya ka bai bordiñ khamtam yong ki manyung wa chah ktah bha nei em ka khang chnong namo ka Lockdown.
Ha ka dorkhat, neiliang u Kynjaimon da ong u wa man i iwa khia bha i chitom wa yachem ki bru neidaw wa em kani ka Lockdown neibhah wa da ktah ko ym du ya ki paidbah ha sor tangwa wot cha ki palat sor leh kamjooh.
Da ong u leh wa ki bru wa em ha i dooh i duk wei duna ka poisa wa pynlang ki da poi hadooh u pood wa hap yanap ki wow thied mar baam wei chitom i thij i pyrkhat ki lada man kamni wei em leh kiwa haap su ya ka bai yung, bai um, dawai wa kiwi kiwi.
Chooh chooh da ong u wa neidaw wa da khang yei khih i kreh ki bru da toh i kaamram ka sorkar wa ka imlang sahlang wow yarap mar kylliang iwi ya iwi.
Heiyatoh wa ini i chem chitom ki paidbah khamtam ki manyung wa dooh ha Umkiang wa ha ka jylla waroh kawi da kyntu u wow pynduna ya ka bai bordiñ (Electricity Bill) mar chiteiñ namo 50% ya ki paidbah wa dooh ha ka jylla waroh kawi wei deiwa leh kamni daw pynsuk bha ko ya ki paidbah.
Da tyrwa u leh wa ka sorkar jylla wa ka MeECL chirup wa ki bor chnong ye ki wow jied ya ki manyung wa em hei dooh wow e yarap ya ki.
Discussion about this post