Ka Dorbar Chnong Umlyngsha, East Jaiñtia Hills kawa pait ya ka Sailynter Fish Sanctuary kawa nyngkong dooh hapoh ka District da ong ko wa nadooh wa pynbna ya ka wow man ka ka thwai wa da yada (Sanctuary) ha ka 5 Kmaichonglad 2019 da sakhi wa katni da roi bha ki doh-um ha kani ka thwai.
Neiliang u Waheh Chnong ka Umlyngsha, u Namphrangmi L Talang da ong u wa katwa heipor wa ympu pynman ya ka kam ka Fish Sanctuary ha kani ka thwai, em hi ki dakha wa ki doh-um tangwa rap duna bha ki.
Da pyntip chooh chooh u wa nadooh wa khang u khwe, u sum, tongjar, dat dawai bih, dat dynamite, da sakhi wa da kharoi bha ki dakha.
Chooh chooh da kytnu u ya ka sorkar lyngba lyngba ki bor District wow thooh laad kammon u leh neibynta u pynman ya kani ka thaw kam ka Aqua Park hapoh ka District khamtam wow yarap pynyoh Scheme neibynta wow chna ya ki thaw chongke, ki luti lai-kjat, yingkieñ, ki lieñ wa kiwi kiwi.
