Ka EJNC ya da kyntu ko ki paaid ka jaitbru yong i khamtam kiwa na East Jaiñtia wow husiar bha na ki kaam chah thok poisa.
Ka seiñ da ong ko wa hadien wa em ki paralok wa ujor cha ka seiñ wa em ki bru kiwa chim kabu ha ki pyrtuid ki sahep sorkar wow kular kreh ya ki ha i dor poisa wa da booh da kitæ ki damok, kamtæ da chah thok ki da ki lak tangka.
Neiliang yong ka seiñ da sñiawkhia ko yeini i jia wei da boonsien leh da sñiaw bha kam ini i jia katwa kamtæ ka seiñ da kyrpaad joor ko ya ki khynroo khyllood wymhoi u chah pynbiej khlem da yoh yutip iwa biang wei wow kylli leh chwa cha ki yung krehkaam næ ki sahep kiwa sakhiat.
“Ki jait kreh hi toh u thooh chwa na ki Advertisement wa na ki Notice Board yong ki Office” da ong ka seiñ.
Neiliang ka seiñ ym chong kli-kti ko ya kam kini ki kaam wa ktah ya ki khon khynroo wow chim kabu khamtam ha kani ka pyrthai dooh khih dooh kreh, wei ka seiñ leh daw booddien ko ya kini ki bru wow yoh kem ya ki wow e leh cha kti ka aiñ.
