Ki heh ka Election Commission of India hapoh i yahkhmat yong u Chief Election Commissioner, u Rajiv Kumar da poi ki ha Shillong wow bichaar yei pynkhreh yong ka jylla wow jied thymme ya kiwa mihkhmat MLA kawa daw pynman noh ha ki sngi wow wan hadien wa ka samoi krehkaam wa katni u kut noh ko ha ka 15 tarik u Wisu (Mar) 2023.
Hawa klam cha ki laad pathai khubor, u Chief Election Commissioner yong ka India da kyntu u ya ki paidbah ka jylla wow chimbynta chongchit hei jied ya kiwa mihkhmat, wei da pynrap wa ka Meghalaya toh ka jylla kawa em i suk i saaiñ wei ka Election toh ka tamasa yong ka synchaar ka khadar.
U Rajiv Kumar da khana u palat 20 lak ngut kiwa chong chnong ka jylla daw jied ki ya kiwa mihkhmat wa thymme, wei kiwa thap Vote kynthai da em ki 10,92,326 ngut wei da tam ki ya ki chynrang kiwa em 10,68,801 ngut. Da khana u leh wa ki khynroo kiwa daw yoh u thap Vote ha ka sien wa nyngkong kiwa ha ka rta kawa 18-19 snem da em ki 81,443 ngut wei kiwa da palat 100 snem da em ki 290 ngut.
Kiwi de ki laad ki luti wa da chim da ka ECI ha kani ka Election toh wow pynemkaam ya ka ‘Form 12 (d)’ neibynta ki tymmen wa ki bru wa em i duna hei doh i pran yow ye ki u thap Vote na yung, najrong kini daw booh 120 tylli ki Polling Booth du neibynta ki kynthai.
Ha ini i wan wa ar sngi yong u Chief Election Commissioner, da synraan lang ya oo da ki arngut ki Election Commissioner kitæ u Anup Chandra Pandey wa u Arun Goel heiwa da yoh ki ya ka laad wow ya phyllu yumut bha wa ki seiñ saaiñpyrthai ka jylla wa ki sahep yong ka jylla wa kynthup nadooh u Chief Secretary, u DGP, u Chief Electoral Officer ka jylla, neitæ ki pulit wa chipai kiwa em hapoh ka jylla.
