Ka seiñ kiwa khayi cha baar ri lyngba ka Dawki Land Custom wa tip kam ka Foreign Trade Chamber of Commerce Meghalaya (FTCCM), hadien wa da lai yachem ko ya u MLA ka thaaiñ uwa man leh u montri ka sorkar jylla, u Lahmen Rymbui ynnin ka sngi, da kyrpaad ya oo wow pynku ya i em ki kari neibynta wow chalan mar cha ka ri Bangladesh, ynne won ka sngi da lai yachem ki ya u SDO ka Amlarem Civil Sub-Division, West Jaiñtia Hills u Abhilash Baranwal hajrong ini i jooh i kaam neibhah wa katkam wa man katni da pynlait dang du 250 tylli ki kari ha ka chi sngi napyrdi ki 600 ngut ki Exporter.
Ka seiñ da ong ko wa neiliang u u SDO da kular u wow chimkhia ya ini i kaam wei daw pait u yei man i long ka pyrthai.
U President ka FTCCM, u Richard Pohiong da ong u wa lada pait kitu kiwa tih mar poh-khyndaw du ka bhah yong ki, em kiwa em hadooh 20, 30 næ 40 kari, wei boon hi ki wym yoh de u phah mar cha Bangladesh katkam ka yakut lyngba ka Letter of Credit (LC) wa ki dhab (Parties) kiwa na Bangladesh.
Ha kini ki por wa khang-sbak da ong u wa em kiwa dang krehkaam ka LC wei em leh kiwa da sahkut noh wei ini da wanrah i ya i eh i khoo ya kiwa khayi na waroh ar ri.
Neiliang won u Secretary ka seiñ, u Daniel Khongsit da ong u wa ini i pynlait du 250 tylli ki kari da pynchitom ko ya i thij i pyrkhat la ha yung, ha chong ha thaw wei da wanrah i yei yachruit para wa khayi kiwa yoh wa kiwa ymyoh wei kamtæ da kyruiñ ki cha ka sorkar deiwa kyntu wow thooh laad wow chah ya ki kari waroh deiwa kdaw wa kamwa da leh wow chah ya ki kari kamai da ka Odd Even ya ki leh toh u chah ha i jooh i rukom.
Chooh chooh u Daniel da ong u wa kamwa man ka sorkar da leh bha ko ya ki paidbah ha iwa boon i liang nadooh u MLA ka thaaiñ, kamtæ da kyrpaad wow pynbha chooh chooh ha i rukom wow yoh bhah lang ki ha i khayi lym kamtæ daw ktah joor bha i ya ka khayi pateiñ khamtam daw wanrah i ya i sih hapyrdi kiwa khayi.
