Shillong: Ka HANM Laban Circle kyrpaad ko ya waroh ki paidbah wa kynthup nadooh ki waheh chnong, kiwa e yung wai, kiwa wanrah wakreh mylla (Contractor) kiwa em haka thaaiñ Laban waroh kawi, wow man ki kiwa paitbniah yei psiah i mih ki bru kiwa na baar (Foreigners), hapoh ki chnong kiwa haap haki phra dorbar yong ka thaaiñ Laban waroh kawi.
Ka seiñ dap ko da i sñiawkhia wow yoo wa ha kini ki kajiak sngi wa da lai da mih i chah thombor yong ki para wa yahkhmat seiñbhalang hapoh Ichamati, kat hadooh u pood wa ki mynder da nood ki wow pynkut ya i mynsieñ bru. Ka HANM da kyntu joor ko ya kiwa synchaar chnong wa ym toh de wow e (Issue) kiwon kiwon ki pynsakhiat (Certificate) yaki mynder kiwa thmu wow wan chong wai, wan mylla næ kiwa wan seiñ kaam seiñ jaam hapoh u pood u ang yong ki phra dorbar ka Laban. Ka seiñ da pynrap ko wa ini toh chibynta wow kdoh u khoom yei yoh psiah laitlan ki bru kiwa na baar, wow khayi pateiñ, u mylla næ chongwai kawa ye won wow wanrah cha i man khian paaid ki tre chnong Khasi wa Jaiñtia ha ki chnong ki thaw.
Ka HANM ngait ko wa ini i chimkhia wow piatbniah ym pynsihlet ko yaka pateiñ wow dang kha, neibhah kani ka juk katni toh ka juk yaleh, wei emkaam wow khyrngiat yong bru chwa waka jaitbru u ngam ko haka duriaw bah na i wan tyllep ki bru wa na baar, lada yaka chnong yong i hi ym ye i wow kitkhlieh, sepai i kreh chitom neibynta ki khon ki kti yong i, neibhah wa ki khon toh kiwa chimkti yaka kaam yahkhmat chnong, yahkhmat paidbah hadien yong i.
Khaddooh ka HANM Laban Circle da kyrmen ko ini i kyrpaad yong ka seiñ daw pynkhyrngiat yong bru ko yaka dorbar chnong ym du ha Laban, wot hadooh waroh kiwa yahkhmat chnong ha sor, ha khapsor wei kamjooh leh cha nongkyndong.
Discussion about this post