Ka Hynñiewtrep Border Dispute Redressal Forum (HBDRF) ynne ka sngi da lai yachem ko wa u Deputy Commissioner ka West Jaiñtia Hills District u Garod LSN Dyke wei da kyrpaad ya oo u yaklam u wa ki bor pynlai ka West Karbi Anglong District hajrong i thmu yong ka sorkar Assam u chna yaka University ha chnong Khanduli ka thaw wa dang haap hapoh i yakajia pood hapyrdi ka Assam waka Meghalaya.
Da ong wa katkam i yoo yong ki lyngba ki khubor yong ka Assam haka 31 tarik u Naisan u CEM ka Karbi Anglong Autonomous Council, u MLA ka Baithalangso, ka Member Autonomous Council deilang wa kiwi won ki bru ka sorkar Assam da hiar lai pait lai sylli ki neibynta u chna yaka University ha Khanduli.
Hei lai yachem ki wa u DC ynne ka sngi najrong u Chairman ka HBDRF u Chandame Sungoh, ka Secretary ka P. Phawa da emlang leh u MDC ka Mynsngad-Khanduli u Dawan Lyngdoh, u Nehemayah Tyngkan wa kiwi kiwi.
Heiyatoh wa kani ka jooh ka phang neibhah wa da em kiwa lai ujor chwa cha u DC, kamtæ neiliang u DC khana u haki wa da dep phah chithi u cha u CEM ka JHADC, cha ka Border Magistrate wei ya kani ka kaam hi ha kani ka tayaw daw hiar takit ki.
Hei yaklam won wa ki dkhot yong ka Hynñiewtrep Border Dispute Redressal Forum ong ki wa katkam i yoo yong ki, ka thaw wa thmu chna University ka Assam daw ktah hi ko yaka jylla wei emkaam u chimkhia neibhah hei sakhiat hi haki thaw khappood toh u em i ya pyntip kylliang.
Ong haroh ki wa lada wan kawon kawon ka Scheme næ kattæ da ka University hei dur yong i roi i paar sñiawkmen hi ki, tangwa tieñ sar won ki yaboi mynstep mankawi daw chah kam i thaw.
Da kylli haroh ki deiwa ong neiyi i daw thmu ki u chna ha Khanduli lym toh wa em yumut wow kam thaw, wot hawa i thaw toh iwa dang em hapyrdi i kajia pood.
