Ka seiñ HITO Jowai Circle da pynsñiaw ko yei sñiawngooh yeiwa da ye u pynman ya ka Meghalaya Game hapoh ka West Jaiñtia Hills District wa da toh hi ka pali wei da kmen leh wa wot hei duna wa boonjait ka sorkar da yaleh ko u thooh laad thooh luti wow pynjanai hei wow pynbha pynmiat ya ki madan yalehke, ki Indoor Hall wow yoh kiwa na kylleiñ ki District u wan yooh kjat wei wow yalehke ha kani ka chnong ka thaaiñ yong i.
Kamtæ ka HITO Jowai Circle kyntu ko ya ki bor District wow sñiawbha phi u pynbiangbha heiyatoh wa waroh ki liang nadooh i baam i dih, i thaw chong thaw sah wa kiwi kiwi de iwa emkaam yong ki khynnah wot ya ki Volunteer nadooh ka bai nongsngi waka bai baam bai dih ya ki.
Ka seiñ da ong ko wa kamwa da yoo wa ynnin u snem hawa pynman ha Tura da sñiawsih u yoo boon i eh i tynjooh wa hap maad kiwa yalehke nadooh i baam, i thaw thiah thaw dem hadooh ki thaw mihlait mihbaar, kamtæ ka seiñ hei yahkhmat u President, u Owansaki Paswet chirup wa u GS, u Deibormi Siangbood da kyntu ki ya u DC yow lait ka West Jaiñtia Hills nei boodnaam khamtam ka chnong Jowai kawa man ka Headquarter.
Chooh chooh da ong wa hap wow husiar wei wow lehbha neibynta ini i burom yong ka District yong i deiwa e khublei leh ya ka sorkar wa da ye ko u pynman ya ka Meghalaya Games ha Jowai wei da kyrpaad leh ya ki para chnong wow yarap ya ki paralok kiwa wan na kiwi ki chnong lada chem cha luti syngkieñ lada em ki hei eh khamtam u pynyoo yei akor i burom yong ka chnong Jowai.
Discussion about this post