Ka seiñ Hynñiewtrep Youths’ Council (HYC) Central Executive Council, da thoh ko cha u Lat ka jylla heiyatoh wow kynthup ya ki paaid Niam Khasi wa Niamtre kam ki jaitbru khian-paaid.
Ka seiñ da kdaw ko wa hadooh katni da tip du ya ki 6 tylli ki jait niam kam ki khian-paaid kiwa kynthup ya ki Muslim, Sikh, Buddhist, Parsi, Christian wa ki Jain wei da tip ya ki kam ki Religious Minorities ka India hapohka Section 2(c) yong ka National Commission for Minorities Act, 1992.
Ka seiñ da pyntip ko wa ki jaitbru Khasi wa Jaiñtia ha Meghalaya, Assam wa kiwi ki bynta ka ri bood ki ya ka niam Khasi wa Niamtre heiwa em ki 3 lak ngut kiwa bood ya kini ki niam ha kylleiñ ka ri India wei man ki kiwa sahdien ha i yoh i laa (Economically), i puræ puthi wa kiwi kiwi, wei emkaam ki yei yarap wa i yada na ka sorkar India wa ki sorkar jylla.
Chooh chooh da ong ka seiñ wa khnang wow kyntu kynrong ya ki ha i puræ puthi, i yoh khih yoh kreh, i seiñ kreh wei wow pynduna yei chah ieh dien ki kamwa da kular ha ka riti synchaar ka ri, da kyntu na u Lat wow kyrpaad ya ka sorkar India wow tipmit ya ki bru wa bood ya ka niam Khasi wa Niamtre wow man ki kam ki khian-paaid namo ki Minority Community katkam ka National Commission for Minorities Act, 1992.
Da kyntu leh wow kyrpaad ya ka Office of the Registrar General & Census Commissioner, Ministry of Home Affairs, Government of India, wow booh jar i bynta (Classification) ya ki bru wa em ha ka Niam Khasi wa Niamtre wei wow dam u kynthup ya ki ha ka “Other Religions” khnang wow tip neini chaphrang katwon ngut kiwa bood ya kini ki niam.
