Ka Hynñiewtrep Youth’s Council (HYC) Sohïong Circle ha ka 25 tarik uni u bnai da phah ko dei thoh cha ka sorkar jylla wow pteiñ yei pynkreh ya u sarok-bah na Umshyrpi hadooh Bañiun (Shillong-Dawki Highway).
Ha i thoh wa ka seiñ da e ko cha u Chief Minister wa u Deputy Chief Minister uwa man leh uwa pait ya ka PWD wa kamjooh leh cha u Minister wa pait ya ka chnat Forest and Environment, ka seiñ da pynsñiaw ko yei eh wa ki paidbah yong ka thaaiñ da yachem ki man-i-por nei sahkut kari ha ki thaaiñ Upper Shillong hawa lai wei wan Shillong.
Da pynsñiaw leh wa i sahkut kari da em ki por dei yong kynta wei em leh ki por wa waroh chi sngi iwa da ktah hadooh kattæ kattæ yei lai i wan ki paidbah. Ka seiñ da pynsñiaw ko leh wa i pynheh ya u surok na Umshyrpi cha Upper Shillong toh i angnood wa da slem bha da u paidbah wa boon kiwa jooh lai jooh wan na katai ka thaw kiwa da chem yei eh na i sahkut kari.
Ka seiñ da pynsñiaw ko leh wa kiwa boon kiwa pyrchah yei pynheh sarok na Umshyrpi ha Bañiun, ym toh kiwa na ka jylla Meghalaya wei ym tip ki iyi iyi chaphang i eh wa ki paidbah yong ka jylla da yachem ki hawa lai wa wan ki na katai ka thaw.
Ha i jooh i por da pynsñpaw leh ya i sñiawphylla wei i wym yoosuk wow yoo yei pyrchah yong ki kattu katni wa mih du hawa pynkreh da poi i hajan yong ka thaw ki chipai iwa ym ye wow pdiang.
Ka seiñ da kyntu ko leh ya ka sorkar wa toh u lai ko chakhmat wow pam ya ki dieñ kiwa wit ha ki thaw wow pynheh ya u sarok wei da e yumut wow thung da kiwi heithaw yong ki ha waroh arliang yong u sarok deiwa ye u pynneh pynsah ya ki dieñ wei ha i jooh i por wow pynmiat ya ka sarok ha waroh chi lynter.
