Jowai: Ka HYC Mawthadraishan Circle ha ka 14 tarik uni u bnai da lai yachem ko ya u Chief Engineer yong ka chnat PWD (Roads) ha ka kamra krehkaam yong oo ha Shillong wow booddien hajrong i suki palat wow pynkrehkaam ya ki sarok hapoh ka thaaiñ Mawthadraishan lyngba ka Scheme PMGSY.
Ka HYC na ka por cha ka por da jooh lai ood lai naam ko cha ki bor sorkar hajrong ki eh yong ki paidbah ka thaaiñ khamtam i sih yong ki sarok hapoh ka thaaiñ Mawthadraishan Block. Ka seiñ da pynsñiaw ko ya i sñiawkmen wa ka dong wa ka thaaiñ yoh ko yaka kyrkhu lyngba ka Scheme PMGSY nalor kiwi de ki sarok wa da yoh nachwa, katni da yoh biang sa kamwa 46 Km ha ki 7 tylli ki thaw kiwa kyntup yaka Umlieh-Nongriat 15 Km, Laitkseh,Marngor-Phyllut 4.5 Km, Laitkseh-Wahliewlong-Mawkohngei 10 km, Nonglait-Rngikseh 4.5 Km, Pariong-Laitnamlang 3 Km, Shohphria-Lawrapha 6.5 Km wa Shohphria-Ksehkohlong 3 Km.
Ha ka yachem ka seiñ wa u sahep yong ka chnat PWD da ong wa neiliang yong oo waka chnat krehkaam, ki leh sñiawkhia wei angnood ki wow pynsmat ya kani ka kaam, wei da pyntip u wa i daw wa pynman ya kani ka kaam wow slem toh neidaw wa ym em wa thap Tender wei da hap wow khut daka Re-Tender sa chisien.
Da pynsñiaw u leh wa kam ki seiñgbhalang toh wow ya krehlang deiwa booddien ya kawi pa kawi ka surok wei wow paitbniah wa ka kaam u lai bait ko neibynta ki paidbah.
Ka seiñ da e khublei ko leh yaki Contractor kiwa da sdang pynkrehkaam ya ki kattu katni na kitai ki sarok wei da kyntu leh ya ki wow kreh ryntih katkam ki kyndon wa da booh da ka sorkar khnang wow ye u pyndep ha i por wa biang, da ong ka kyrwoh na u Marcos R Marthong, President HYC Mawthadraishan Circle.
Discussion about this post