Jowai : Ka Jaiñtia Students’ Movement (JSM) Central Body lyngba ka khubor na u president ka seiñ u Leningstar Rymbai da pyntip u wa ka seiñ da khut ko ya ki paidbah kiwa chong chnong ka East Jaiñtia Hills nadooh ki Waheh Chnong, ki Secretary Chnong, ki bru wa chemphang, ki manbei manpa, ki seiñbhalang, ki khynnah, wa kiwi kiwi wow yachim bynta lang ha ka yalang paidbah neibynta wow phyllu yumut hei wow dawa thaw puræ Sorkar (Government College) hapoh ka East Jaiñtia Hills ka wow man ha ka 8 tarik uni u bnai heipor 9:30 i step ha Madan ka skur Don Bosco H.S. School, Khliehriat.
I thrang ka seiñ wow pynman ya kani ka yalang paidbah neibhah ka seiñ yoo jngai ko wa ka College Sorkar man ko kawa emkaam bran bran hapoh ka District neibhah boon ki khynnah puræ ieh ki yei puræ neidaw wa dooh ki bei ki pa ki wei ym ye ki u kyrchaan ya ki wow pteiñ ki yei puræ la hapoh ka jylla namo cha baar jylla.
“Hapoh ka Jaiñtia Hills em du kawi ka College sorkar katæ toh ka Kiang Nangbah Govt. College wei kani ka thaw puræ ym ye de ko u pdiang chiboon ki khynnah puræ neibhah wa da khynnia ki kamra (class)” da ong u Leningstar.
Neitæ i daw ki khynnah khynroo khyllood ieh ki yei puræ yong ki neibhah wym yohlaad ki u lai puræ cha kiwi ki thaw, wei nei kutlaad pynbor ko ya ki wow ngat ki ha ki kaam sih, da ong ka seiñ.
Kamtæ da kyntu ka seiñ ya ki paidbah ka East Jaiñtia wow wan cha kani ka yalang khnang wow ye u pynman kaam yeiwa emkaam dooh ka District wa ka thaiñ.
Discussion about this post