U President ka Jaiñtia Students’ Union (JSU) u Lawyerson War ynne ka sngi da ong u wa kam ki dkhot ka seiñ ym man ki du kiwa paitke hajrong i chah beiñ wei chah yoobeiñ ki para jaitbru ha kiwi tawon ki jaitbru pyn hapoh ka ri wei da smai ki leh chwa wow seiñ seiñ wow tia ki chaphrang wow yada ya ka ri wa ka jaitbru.
Kamtæ hajrong i kyn’aad wei wow klam pynchoi da ki bru kiwa kwah wow chim kabu ya i man khian paaid wa i man khooid ka jaitbru Ynñiawtrep kawa tip bru tip Blai, neiliang ka seiñ da klam che ko wa ym man ko kawa chong kli-kti donhi wow bynda ya ka ri wa ka jaitbru tangwa yieñ skem ko wow yada yei man kyrpang ka jaitbru.
Da ong ko leh wa e wa i snaam u tooid i ha madan neibynta ka jaitbru, wei ym randien de ki neibhah wa da chem ki chiboon i eh i khoo wei da em leh boon tylli ki mynsien wa kordor wa da dooh du neidaw ki bru wa na baar, da ong u President ka seiñ.
Da ong leh wa i dooh yei mynsien u dkhot ka KSU ha Ichamati u man i thij kam u khnam wa dung ya u dohnood ka jaitbru wei hajrong ini ka seiñ leh ym chong rngip khmat ko tangwa daw e mynsien chooh chooh ko ya ka wow kreh neibynta ka ri wa ka jaitbru.
Kamtæ hajrong ini ka seiñ klam che ko wow man kawa da pynkhreh deiwa dawa wa kiwi tawon ki bru wa na baar (Baladeshi Bengali) wow mih noh ki na kani ka ri deiwa kyntu ya kiwi ki para seiñbhalang wa ki dkhot ka jaitbru wow yatylli neibynta ka pateiñ kawa daw wan.
